होली मनाएर रमाइलो गर्दै कर्णाली पुलबाट नदीमा फाल हानेका १७ जना युवामध्ये एकजना बेपत्ता भएका छन् ।

बेपत्ता हुनेमा कैलालीको चिसापानी ३० वर्षीय युवा लोकेन्द्र शाही छन् । 

होली मनाउने क्रममा मदिरा सेवन गरेका युवाहरू पौडी खेल्ने उद्देश्यले कर्णाली पुलबाट फाल फालेका थिए । तीमध्ये एकजना भने बेपत्ता भएका हुन् । उनको खोजी कार्य तीव्र पारिएको जिल्ला प्रहरी कार्यालय कैलालीका प्रहरी नायब उपरीक्षक (डीएसपी) कुलदीप चन्दले लोकान्तरलाई जानकारी दिए ।

‘अरुले सम्झाउँदा पनि अटेरी गरेर ती युवा पौडी खेल्न भनेर फाल हानेको पाइएको छ,’ उनले भने ।

पुलमा भीडभाड हुनका बीच उनीहरू नदीमा फाल हानिरहेको सामाजिक सञ्जालमा राखिएको भिडियोमा देख्न सकिन्छ । 

ती युवाहरू आफूले प्रहरीलाई खबर गर्छु भन्ने सोच्दा–सोच्दै आँखैअगाडि हाम फालेको प्रत्यक्षदर्शीसमेत रहेकी स्थानीय पत्रकार इन्दु केसीले सामाजिक सञ्जालमा बताएकी छिन् ।

‘प्रत्यक्षदर्शी भएर म पनि रमिता हेर्ने जमातमा परेँ । हाम फाल्दैछन् भन्ने थाहा पाउनेबितिकै प्रहरीलाई खबर गर्छु भन्ने सोच्दा–सोच्दै हाम फाले  । समयमा खबर गरेको भए सायद घटना हुने थिएन कि !,’ उनले फेसबूकमा लेखेकी छिन् ।