राष्ट्रिय स्वतन्त्र पार्टी (रास्वपा)का सांसद मनीष झाले कुनै प्रष्ट र कानूनी आधार नभएको विषयमा आफ्ना सभापति रवि लामिछानेमाथि व्यक्तिगत प्रहार गरिएको भन्दै आपत्ति जनाएका छन् ।

प्रतिनिधि सभाको बैठकमा बुधवार झाले प्रायोजित सूचनाको आधारमा पत्रकारले लेखेकै भरमा व्यक्तिमाथि लाञ्छना लगाइएको बताएका हुन् ।

‘सदनमा बोल्न पाउनुपर्छ । तर सदनमा निराधार र व्यक्तिमाथि लाञ्छना लगाउन पाइँदैन । कानूनले पनि यस्तो अधिकार दिएको छैन । प्रहरीले भनिसक्यो, प्रधानमन्त्रीले धारणा राखिसक्नुभयो । प्रहरी चौकीमा उजुरी परेको छ । तर दर्ता भएको छैन । प्रायोजित रुपमा पत्रकारलाई लेख्न लगाइएको छ । आरोप छ । सूचना छैन ।  निष्कर्ष छैन । व्यक्तिमाथि गरिएको प्रहारप्रति हाम्रो आपत्ति छ । कानूनसम्मत जाउ, प्रक्रियागत रुपमा जाऊँ । कति कुण्ठा पालेको ? यस्तो राजनीति नगरौं’, उनले भने, 'समस्या सुशासन नभएर हो । पब्लिक सर्भिस डेलिभरी नभएर हो ।'

सुशासनको लागि रास्वपा दलको स्थापना भएको उनले बताए । सबै भ्रष्टाचारको छानबिन गर्न पनि उनले माग गरे ।​​

भष्ट्राचारको फाइल खोल्दा सबै दलका शीर्ष नेता र आफ्नो दलको सभापतिमाथि पनि छानबिन गर्दा आपत्ति नहुने उनले बताए ।

तर व्यक्तिमाथि एकपक्षीय ढंगले उत्रिनु उचित नभएको उनले बताए ।