राष्ट्रिय प्रजातन्त्र पार्टी (राप्रपा) संसदीय दलका प्रमुख सचेतक ज्ञानेन्द्र शाहीले गृहमन्त्रीको निर्देशनमा मंगलवार आफूमाथि कुटपिट भएको आरोप लगाएका छन् । गृहमन्त्रीले आफूलाई संविधानभन्दा माथि राख्न खोजेको उनले आरोप लगाए । 

बुधवार प्रतिनिधि सभा बैठकको आकस्मिक समयमा सांसद शाहीले गृहमन्त्रीको आदेशमा आफूमाथि कुटपिट गरिएको आरोप लगाएका हुन् ।

‘हिजो मलाई गृहमन्त्रालयको आदेशमा डीएसपीले पक्रेर कुटपिट गर्न र मेरो लगाएको कपडा च्यात्नसम्म लगाउनुभयो’, शाहीले भने । राप्रपाले गरेको प्रदर्शनका क्रममा हिजो शाहीमाथि प्रहरीले लछार-पछार गरेको थियो । 

अमेरिकी राष्ट्रपति कार्यालय ह्वाइट हाउस अगाडिसमेत शान्तिपूर्ण प्रदर्शन गर्न पाइने शाहीले बताए ।

‘गृहमन्त्री अमेरिका बसेर आउनुभएको हो, अमेरिकी नागरिक पनि हुनुहुन्थ्यो, अहिले नेपाली नागरिक हुनुभयो । ह्वाइट हाउसको अगाडि पनि प्रदर्शन गर्न पाइन्छ भन्ने तपाईंलाई थाहा छैन ?’, उनले सोधे ।