सहकारी ठगीमा गृहमन्त्री संलग्न छन्, उनले कुनै हालतमा उन्मुक्ति पाउनु हुन्न: शेखर कोइराला

नेपाली कांग्रेसका नेता डा. शेखर कोइरालाले सहकारी ठगी प्रकरणमा गृहमन्त्री रवि लामिछाने संलग्न रहेकोमा द्विविधा नभएको भन्दै कुनैपनि हालतमा उन्मुक्ति पाउन नहुने बताएका छन् । नेपाल प्रेस युनियनको ३३ औं स्थापना दिवसको अवसरमा बिहीबार प्रेस युनियन कोशी प्रदेशले विराटनगरमा गरेको कार्यक्रममा कोइरालाले लामिछानेलाई कुनै हालतमा उन्मुक्ति दिन नहुने बताएका हुन् । 

‘मैले अहिले हरेक मिडिया फलो गरिरहेको छु । सामाजिक सञ्जाल पनि हेरिरहेको छु । गृहमन्त्रीका दुई पासपोर्ट र नागरिकता हुँदा लेखिरहनुभएको छैन । संसद्मा महासचिव पदमप्रसादको दुई नागरिकता पासपोर्ट छन् । तर उहाँको केही हुँदैन । छानबिन हुँदैन ?,’ उनले प्रश्न गरे, ‘सञ्चारमाध्यममा लेख्नुपर्छ । हामीले बोल्नुपर्छ । देशको कानून गृहमन्त्रीलाई लाग्दैन ? गृहमन्त्री भएको नाताले सहकारी ठगीमा उन्मुक्ति दिने ? यो हुन सक्दैन । सहकारी ठगीमा गृहमन्त्री संलग्न हुनुहुन्छ । यसबाट उहाँले उन्मुक्ति पाउने हुँदैन भन्नेमा कांग्रेसको प्रष्ट छ । यसमा द्विविधा छैन । जसले बचाउन खोज्छ पार्टी, दल र व्यक्ति भएपनि एक्सपोज गरेर जान्छौं ।’

मकै पोलेर, पानी र चिया बेचेर जम्मा गरेको पैसामा खुलेआम ठगी हुँदा चुप लागेर बस्न नसकिने कोइरालाले बताए । पछिल्लो कान्तिपुर प्रकरणले सरकारको निरंकुश चरित्र उजागर गरेको उनको भनाइ छ ।

‘प्रधानमन्त्रीले पहिलो दिन कैलाश सिरोहियालाई समाएको थाहा छैन भन्नुभयो । समात्नलाई हिजो मैले नै अर्डर गरेको भन्नुभयो । यो दशमा के भइरहको छ ? सरकार छ कि छैन । यसरी नै देश चलाउने हो भने हामी कहाँ पुग्छौं ?’ उनले भने, ‘सरकार कसरी सञ्चालन भएको छ ? यो गम्भीर छ । रोहिंग्या नागरिकको हिसाबले गडबड होला, गलत भए दण्ड पाउनुपर्छ । तर यो किन गरिएको छ । बूढी मरी भन्दा काल पल्कियो भन्ने समस्या छ । व्यक्ति कैलाश केही होइन । अहिले कान्तिपुरलाई जसरी आक्रमण गरिएको छ, यो अनुचित छ ।’