‘रविको दोहोरो पासपोर्टमा छानबिन गर्नुपर्दैन भन्ने महान्यायाधिवक्ता कार्यालय के रास्वपाको भ्रातृ संस्था हो ?’

नेपाली कांग्रेसका महामन्त्री विश्वप्रकाश शर्माले महान्यायधिवक्ताको कार्यालय रास्वपाको भातृ संगठन जस्तो बनेको टिप्पणी गरेका छन् ।

दोहोरो राहदानीमा मुद्दा नचल्ने र सहकारी ठगीमा संलग्न नरहेको भनेर दिएको पत्र महान्यायाधिवक्ता कार्यालयको क्षेत्राधिकार बाहिरको विषय भएको उनले बताए । 

शुक्रबार प्रतिनिधि सभा बैठकपछि संसद भवनमा पत्रकारहरूसँग कुरा गर्दै महामन्त्री शर्माले महान्यायाधिवक्ता कार्यालय गृहमन्त्रालयको शाखा जस्तो बनेको टिप्पणी गरेका हुन् ।

‘प्रतिशोध स्वरूप कैलाश सिरोहिया रातारात भाग्ने जस्तो गरेर गिरफ्तार गरियो । गिरफ्तार गर्ने निकायमा को हुनुहुन्छ ? दुई वटा पासपोर्टको कारण छानबिन हुनुपर्ने भनेर आरोपित व्यक्ति गृहमन्त्री हुनुहुन्छ । महान्यायाधिवक्ताको कार्यालयले के भनेको छ भन्दा दोहोरो राहदानीमा छानबिन गर्नु नपर्ने । महान्यायाधिवक्ता कार्यालय रास्वपा पार्टीको भ्रातृ संस्था हो ? गृह मन्त्रालयको शाखा हो ?’, शर्माले प्रश्न गरे, ‘कहिले पासपोर्ट प्रकरणमा छानबिन गर्नु पर्दैन भनेको छ । कहिले सहकारी ठगीमा हुनुहुन्न भनेको छ । त्यो (महान्यायाधिवक्ता कार्यालय) संवैधानिक इजलास हो ? विचाराधीन विषयमा अलग्गै लेखेर दिन मिल्छ ?’ 

महामन्त्री शर्माले सहकारी ठगीबारे छानबिन गर्न बनाउने भनिएको संसदीय समितिमा रविको नाम किटान गर्नुपर्ने बताए ।

‘सहकारी ठगीको विषयमा लामो कुरा केही छैन, जसरी अस्पतालमा आएका सबै विरामीको अप्रेसन गरिँदैन । एपेन्डिक्सको अप्रेसन गर्ने भन्दैमा हस्पिटलमा आएका सबैको त गरिँदैन, जो बिरामी हो त्यसैको गर्ने होला’, शर्माले भने, ‘कागजमा कसैको नाम लेखेपछि समिति बन्नु र नबन्नुको अर्थ हुँदैन ।’

सहकारी ठगीमा रविले एकढंगको स्वीकार्यता गरिसकेकाले कांग्रेस नेताहरूको फाइल खोल्ने बार्गेनिङ गरेको महामन्त्री शर्माले बताए ।

‘कांग्रेसको सभापतिमाथि छानबिन गर्ने हो कि दाई भाउजूमाथि छानबिन गर्ने हो गर्नुस् । नाम थर, गोत्र लेख्नुस् । माइती ससुरालीको कुरा लेख्नुस् । औँठामा भएको शंख, चक्र उल्लेख गर्नुस्’, शर्माले भने, ‘कांग्रेसको कोही भ्रष्टाचारी भयो भने हामीहरू कसैको सती जान्नौं ।’