कार्यादेश टुंग्याउन बस्ने भनिएको शीर्ष नेताको बैठक यत्तिकै टर्‍यो, फेरि आइतबार बस्ने

सहकारी ठगीबारे संसदीय छानबिन समितिको कार्यादेश (टीओआर) टुंगो लगाउन बस्ने भनिएको शीर्ष नेताहरूको बैठक यतिकै टरेको छ ।

प्रमुख प्रतिपक्षी नेपाली कांग्रेसका सभापति शेरबहादुर देउवा सहभागी नहुने भएपछि शनिबार साँझ बैठक बस्न नसकेको हो ।

आइतबार फेरि प्रधानमन्त्री पुष्पकमल दाहाल प्रचण्ड, कांग्रेस सभापति देउवा र नेकपा (एमाले)का अध्यक्ष केपी शर्मा ओलीसहित शीर्ष नेता बसेर सहमति जुटाउने सहमति भएको छ ।

यसअघि बसेको कार्यदलको बैठकमा कांग्रेसले उपप्रधान तथा गृहमन्त्री रवि लामिछानेको नाम किटान नगर्न सहमत गरेको  थियो, । तर पछि गोरखा मिडियाका तत्कालीन प्रबन्ध निर्देशक (एमडी) भनेर लेख्नुपर्ने नयाँ अडान लिएपछि यसमा सत्तापक्ष सहमत नभएको बताइएको छ । 

यता कार्यदलमा सदस्यसमेत रहेका कांग्रेस सहमहामन्त्री जीवन परियारले भने सत्तापक्षले आफैँ नयाँ–नयाँ विषय ल्याएकाले शनिबार सहमति जुट्न नसकेको बताए । 

उनले शीर्ष नेताको बिहान ९ बजे बस्ने बैठकले टुंगोमा पुर्याउने आशा व्यक्त गरे । 

प्रतिपक्षी कांग्रेसले सरकारी ठगी प्रकरणमा गृहमन्त्री लामिछाने दोषी रहेको भन्दै उनीमाथि संसदीय छानबिनको माग गर्दै आएको छ ।