प्रचण्ड र देउवाबीच बुढानीलकण्ठमा ४० मिनेट भलाकुसारी, के भयो कुराकानी ?

संसद्को सकसले बजेट ल्याउने विषय पेचिलो बन्दै गइरहेका बेला प्रधानमन्त्री पुष्पकमल दाहाल 'प्रचण्ड'ले नेपाली कांग्रेसका सभापति शेरबहादुर देउवासँग छलफल गरेका छन् ।

संसद्को गतिरोध हटाउन संसदीय छानबिन समिति गठनका लागि निर्णायक छलफल गर्ने तयारी भएका बेला प्रचण्ड र देउवाबीच बूढानीलकण्ठमा ४० मिनेट कुराकानी भएको हो ।

बालुटावारमा प्रचण्ड, देउवा र एमाले अध्यक्ष केपी शर्मा ओलीको छलफल डाकिएको थियो । तर, देउवा स्वास्थ्यको कारण देखाउँदै बालुवाटार नआएपछि प्रचण्ड बूढानीलकण्ठ पुगेका हुन् ।

प्रधानमन्त्री र देउवाको छलफलपछि कांग्रेस सहमहामन्त्री जीवन परियारले गतिरोध अन्त्यको विषयमा छलफल भएको जानकारी दिए ।

‘प्रधानमन्त्रीको निवासमा आज बिहान प्रधानमन्त्री, एमाले अध्यक्ष र हाम्रो सभापतिबीच छलफल तय भएको थियो । उहाँहरू तीनजना बसेर संसद्को गतिरोध अन्त्यबारे छलफल गर्ने कुरा थियो । तर, आज हाम्रो सभापतिको स्वास्थ्य अवस्थाका कारण जान सक्नुभएन,’ परियारले भने, ‘यतै बसौं भन्दा प्रधानमन्त्री आउनुभयो, तर एमाले अध्यक्ष आउनुभएन ।’

कार्यदलले निष्कर्षमा पुर्‍याउन नसके पनि प्रधानमन्त्री गतिरोध अन्त्यका लागि गम्भीर रहेको पाएको परियारले बताए ।

‘सहकारीमा नागरिकको अर्बौं रुपैयाँ अपचलन भएको विषयमा हामीले निरन्तर छानबिन समिति गठनको विषय उठाउँदै आएका छौं ।  उपप्रधान एवं गृहमन्त्री संलग्न रहँदा विभिन्न सहकारीबाट गोर्खा मिडियामा रकम गएकाले छानिबन हुनुपर्छ भन्ने हाम्रो निरन्तरको माग छ,’ परियारले भने, ‘कार्यदलमा सहमति जुट्न नसकेको अवस्थामा प्रधानमन्त्री पनि गम्भीर भएको पाएका छौं । प्रधानमन्त्रीले सम्भव भएसम्म आज साँझ वा भाोलि बिहानसम्म बसेर टुंगोमा पुर्‍याउनुपर्छ भन्नुभएको छ ।’

छानबिन समितिका सम्बन्धमा विकल्प दिए पनि सत्तापक्षले भुलाउने प्रयास गरेको परियार बताउँछन् ।

‘नेपाली कांग्रेसले गृहमन्त्री लामिछानेको नाम लिएर समितिको अडान लिँदै आएको छ । तर, सत्तापक्षले रविको नाम नलिँदा कसरी छानबिन गर्ने प्रस्ताव ल्याउँछ भनेर कुरिरहेका छौं । हामीले विकल्प दिँदा पनि उनीहरू तयार छैनन्,’ उनले भने ।

परियारले थपे, ‘गोरखा मिडियाको अध्ययन गर्ने भन्ने भएपछि यत्तिले पुग्छ, यहाँ संलग्न व्यक्ति अहिले उल्लेख नगरौं भन्ने प्रधानमन्त्रीको कुरा छ । कम्पनीका सञ्चालक मात्र जवाफदेही हुने हो भन्ने उहाँहरूको कुरा छ,’ परियारले भने, ‘तर हामीले कम्पनीबाट नागरिकको अर्बौं रुपैयाँ लिँदा नियमसंगत लियो कि लिएन भन्ने हेर्नुपर्छ । यत्तिकै समस्या समाधान हुँदैन भनेका छौं ।'

गृहमन्त्री व्यक्ति विशेषको नाम नलिए पनि सहकारीबाट झण्डै एक अर्ब हाराहारी रकम गोर्खा मिडियामा ल्याउने क्रममा कुन तहका कर्मचारीले अपचलन गरे त्यसको टुंगो लगाउनुपर्ने अडान कांग्रेसको रहेको परियार बताउँछन् ।

ओली सहभागी नभएपछि आइतबार बिहान बस्ने भनिएको शीर्ष ३ नेताको बैठक प्रभावित भएको छ । संसद् बैठकअघि नै समिति गठनको गाँठो फुकाउने प्रयत्नमा प्रधानमन्त्री भए पनि कुनै सहमति नभएको हो ।

आगामी मंगलबार बजेट ल्याउनुपर्ने भएकाले त्यसअगाडि संसद् खुलाउनैपर्ने दबाबमा सरकार छ । प्रधानमन्त्रीसँगको भेटपछि देउवा आफ्नै पार्टीका नेताहरूसँग छलफलमा छन् ।