कोशीका निवर्तमान मुख्यमन्त्रीले सरकारी गाडी फिर्ता नगरेपछि प्रदेश सभामा उठ्यो प्रश्न

कोशी प्रदेशका निर्वतमान मुख्यमन्त्री केदार कार्कीले सरकारी निवास नछाडेको र गाडी फिर्ता नगरेको भन्दै प्रदेश सभा बैठकमा प्रश्न उठेको छ ।

नेकपा एमाले संसदीय दलका प्रमुख सचेतक रेवतीरमण भण्डारीले निवास र तीन वटा सवारीसाधन फिर्ता नगरेको भन्दै प्रश्न उठाएका हुन् ।

आइतबारको प्रदेश सभा बैठकमा विशेष समय लिएर बोल्दै उनले काठमाडौं र विराटनगरमा रहेको मुख्यमन्त्रीको निवास केदार कार्कीले कब्जा गरेको आरोप लगाए ।

‘राज्यको सम्पत्ति कब्जा गर्ने काम भएको छ’, भण्डारीले भने, ‘उहाँले मुख्यमन्त्री तथा मन्त्रीहरूको पारिश्रमिकसम्बन्धी ऐन २०७५ को उल्लंघन गर्नुभयो ।’

मुख्यमन्त्रीको कार्यालयका अनुसार निर्वतमान मुख्यमन्त्री केदार कार्कीले ००६२७ नम्बरको भीआईपी कार, ००४६ नम्बरको कार र २५१७ नम्बरको स्कुटरका साथै ६२४ नम्बरको स्कर्पियो अहिलेसम्म फिर्ता गरेका छैनन् ।

‘पद छाडेको एक हप्तामा फिर्ता गर्नुपर्ने कानूनी व्यवस्था छ’, प्रमुख सचेतक भण्डारीले भने ‘उहाँले कानूनी राज्यको उलंघन गर्नुभयो ।’

अदालतमा मुद्दा चलिरहेको बहानाले राज्यको सम्पत्ति गैरकानूनी ढंगले प्रयोग गर्ने काम निवर्तमान मुख्यमन्त्रीले गर्न नसुहाउने उनले बताए ।

भण्डारीले प्रदेश सभाले पारित गरेको संकल्प प्रस्तावको विषयमा तत्कालीन मुख्यमन्त्री केदार कार्कीले नियुक्त गरेका मुख्य न्यायाधिवक्ता रुपेश कोइरालाले गैरसंवैधानिक ढंगले सरकारका निकायहरूमा पत्राचार गरेको विषयको छानबिन गर्न पनि माग गरे ।

कांग्रेसले वर्तमान सरकारका मुख्यमन्त्री हिक्मतकुमार कार्की नियुक्ति प्रक्रियाको विरुद्धमा निवर्तमान मुख्यमन्त्री केदार कार्कीले रिट निवेदन दिएको विषयको निक्र्यौल नभएसम्म प्रदेश सभा सञ्चालन गर्नुनहुने भन्दै प्रदेश सभा वहिष्कार गरेको छ ।

सर्वोच्च अदालतले उक्त रिट निवेदनमाथि यही जेठ १६ गते सुनुवाइका लागि पेशी तोकेको छ ।

निर्वतमान मुख्यमन्त्री केदार कार्कीका प्रेस सल्लाहकार देवनारायण साहले मुद्दाको फैसला नभएसम्म गाडी फिर्ता नगर्ने बताए ।

सरकारी निवास नछाडेपछि मुख्यमन्त्री हिकमत कार्की भने पहिलादेखि बस्दै आएको भाडाको घरमा बस्दै आएका छन् । मुख्यमन्त्रीले प्रयोग गर्ने गाडी भने निवासमा राखिने गरिएको छ । 

‘अहिले पनि केदार मान्यज्यूले मुख्यमन्त्री हुँदा नियुक्त गर्नु भएका कर्मचारी क्वाटरको रेखदेखका लागि बस्दै आएका छन्’, एक कर्मचारीले भने चाबी नबुझाएपछि हामी खोज्दै जाने कुरा पनि भएन । अहिले नयाँ मुख्यमन्त्रीले दिनै जसो क्वाटर खाली भयो भनेर सोधिरहनु हुन्छ ।’