काठमाडौं–नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा)का केन्द्रीय प्रवक्ता खड्कबहादुर विश्वकर्मा (प्रकाण्ड) चन्दा संकलन गर्दागर्दै पक्राउ परेका छन् । 

प्रहरी प्रधान कार्यालयको विशेष ब्यूरोको टोलीले प्रकाण्डलाई काठमाडौंको दक्षिणकाली नगरपालिका– १ चाल्नाखेलबाट पक्राउ गरेको हो । 

पक्राउ परेका प्रकाण्डको साथबाट चन्दा संकलनका लागि तयार पारिएका रसिदको ठेली बरामद गरिएको नेपाल प्रहरीका प्रवक्ता प्रहरी वरिष्ठ उपरीक्षक (एसएसपी) शैलेश थापा क्षेत्रीले लोकान्तरलाई बताए । क्षेत्रीका अनुसार चन्दा संकलनका लागि ठिक्क पारिएका रसिदका ठेलीमा उनको हस्ताक्षर समेत छ । 

प्रहरीले केही महिना अगाडिदेखि विप्लव नेतृत्वको पार्टीका नेता तथा तल्लो तहका कार्यकर्तालाई पक्राउ गर्दै आइरहेको थियो । 

केन्द्रीय तहका नेताहरू खोजी सूचीमा रहेपनि उनीहरू फरार रहेको जनाइएको छ । नेकपा अध्यक्ष विप्लवसमेत प्रहरीको खोजी सूचीमा छन् । उनलाई भेट्नेबित्तिकै पक्राउ गरिने प्रहरीले जनाएको छ । 

गत मंसिरमा सम्पन्न प्रदेश र प्रतिनिधिसभा निर्वाचनमा विभिन्न ठाउँमा बम विस्फोट गराएको घटनामा संलग्न रहेको भन्दै विप्लवसहित नेकपाका विभिन्न नेताको नाममा मुद्दा दर्ता भएको थियो ।