काठमाडौं -आफ्नो उत्पादनको प्रवर्द्धन गर्न पाउँदा किसान र कृषि उद्यमीहरू उत्साहित भएका छन् । कृषि विभाग पूर्वाधार विकास तथा कृषि यान्त्रीकरण प्रवर्द्धन केन्द्र हरिहर भवन ललितपुरले आयोजना गरेको ‘बाह्रौं राष्ट्रिय प्राङ्गारिक कृषि मेला प्रदर्शनी’ले उनीहरूलाई उत्साहित बनाएको हो । 

ललितपुरको जावलाखेलस्थित फूटबल मैदानमा जारी कृषि प्रर्दशनीमा देशैभरिबाट प्रतिनिधिमूलक ढंगले किसान, कृषक सहकारी र निजी कृषि व्यवसायीले सहभागिता जनाएका छन् । १२५ वटा स्टल रहेको उक्त प्रदर्शनीमा प्राङ्गारिक कृषि उत्पादनदेखि साना कृषि उद्योगका उत्पादित वस्तुहरू प्रदर्शनका लागि राखिएका छन् ।

आयोजकले निःशुल्क स्टलको व्यवस्था गरी आफ्नो उत्पादन प्रवर्द्धन गर्ने व्यवस्था मिलाएको छ । करीब ४० हजार अवलोकनकर्ताको अनुमान गरिएकोमा सो भन्दा बढी सहभागिता रहेको वरिष्ठ कृषि अर्थविज्ञ बासुदेव शर्माले बताए ।

उत्कृष्ट प्रवर्द्धककहरू मध्येबाट प्राङ्गारिक उत्पादन, प्रोसेस फूड, खाना परिकार र प्रविधि शीर्षकमा पुरस्कारको समेत व्यवस्था गरिएको आयोजकले जनाएको छ ।

फागुन १६ गतेबाट सञ्चालित उक्त प्रदर्शनी मेला आज १९ गते समापन हुँदैछ ।