काठमाडौँ -पशुपति क्षेत्रमा रहेको अन्नपूर्ण अखण्ड भण्डारले बिहान, दिउँसो र बेलुकाको खाना निशुल्क रूपमा खुवाउँदै आइरहेको छ भन्ने सुन्दा अचम्म लाग्न सक्छ । रोचक कुरा त के भने उक्त भण्डार ३० बर्षदेखि निरन्तर चलिरहेको छ । उक्त भण्डारले पशुपति क्षेत्रमा आवतजावत गर्ने भिक्षु, साधुसन्त र गरीब र अन्य जो कोहीलाई पनि निशुल्क रुपमा खाना र खाजा उपलब्ध गराउँदै आएको छ ।

३० वर्षअघि 'ब्रम्हालिन नागबाबा रोटीवाला शिवगिरी महाराज'ले शुरुवात गरेको भण्डार अहिले 'मेहन्त उमेश गिरी महाराज'ले सञ्चालन गर्दै आएका छन् । एउटा चाखलाग्दो बिषय के छ भने यस भण्डारले ३६५ दिन नै त्यहाँ आउने  सबै मानिसलाई भोजन गराउने काम गर्छ ।

९ बजे बिहानको खाजा, १ बजे दिउँसोको खाना र ६ बजे साँझको खाना निशुल्क खुवाउने यो भण्डारले आएका जो कोहीलाई पनि भेदभाव गर्दैन । भण्डारले दैनिक ५६ थरीका खानाको परिकार तयार गर्छ ।

भण्डारमा काम गर्ने एक कर्मचारीका अनुसार भण्डारमा दैनिक ३० जना कर्मचारीले काम गर्छन् तर नियमित तलब लिँदैनन् । भण्डार सञ्चालकका एक सहयोगीका अनुसार काम गर्ने कर्मचारीलाई आवश्यक परेको बेलामा आवश्यक रकम दिने गरिन्छ ।

भण्डारमार्फत विशेष पर्व बाहेक दैनिकजसो २ सय भन्दा बढी व्यक्तिले भोजन गर्छन् । भण्डार सञ्चालकका सहयोगीका अनुसार १ सयदेखि १ सय पचास त भिक्षु मात्रै हुन्छन् । अन्य गरीब तथा आगन्तुक पनि सय भन्दा बढी हुने गर्दछन् ।

यस भण्डार सञ्चालनको लागी स्वदेशी एवं विदेशीले नगद र विभिन्न प्रकारका खाद्यान्न उपलब्ध गराउँदै आएका छन् । विदेशीले भन्दा पनि बढी सहयोग नेपालीले नै गर्ने गरेको काम गर्ने एक कर्मचारीले बताए ।