धनगढी – जिल्ला अदालत कैलालीले साढे तीन वर्ष पहिले टीकापुरमा भएको घटनामा सांसद रेशम चौधरी दोषी रहेको फैसला सुनाएको छ ।

घटना घटेको झण्डै ४२ महिनापछि जिल्ला न्यायधीश पर्शुराम भट्टराईको एकल इजलासबाट बुधवार फैसला सुनाउँदै घटनामा चौधरी दोषी भएको ठहर गरेको हो ।

सांसद चौधरीसहित ११ जनालाई जन्मकैदको फैसला सुनाइएको छ । त्यसमध्ये एकजना नाबालक रहेकाले उनले १० वर्ष कैद सजाय पाउने छन् । जन्मकैदको सजाय पाउनेले २० वर्ष कैद भुक्तान गर्नुपर्ने हुन्छ ।

यस्तै थरुहट नेता लक्ष्मण थारु र थारु कल्याणकारी सभाका जिल्ला अध्यक्ष लाहुरम चौधरीलाई तीन वर्ष जेल सजाय सुनाइएकाे छ । उक्त अवधि जेलमा नै काटिसकेकाले उनीहरू अब रिहा हुनेछन् ।

अदालतले रामनरेश चौधरी, विश्राम कुसी र नुरुल अली जागलाई भने सफाइ दिएको छ ।

थरुहट-थारुवान र अखण्ड सुदूरपश्चिम आन्दोलनको क्रममा २०७२ भदौ ७ गते टीकापुरमा झडप भएको थियो । त्यसक्रममा ८ प्रहरीसहित १ नाबालकको ज्यान गएको थियो ।

घटनाको अभियोगमा सांसद रेशम चौधरीसहित ५८ जनाविरुद्ध डाँका चोरी, कर्तव्य ज्यान र ज्यान मार्ने उद्योगअन्तर्गत मुद्दा दायर गरिएको थियो । 

गत वर्षको मंसिर २१ गते सम्पन्न प्रतिनिधि सभा निर्वाचनमा रेशम चौधरी कैलाली १ वाट निर्वाचित भएका थिए ।

निर्वाचित भएको १३ महिना पछि गत पुस १९ गते चौधरीले सांसद पदको शपथ लिएका थिए । जेलमा रहेका चौधरी शपथ लिएलगत्तै फेरि सांसदको लोगो लगाएर जेल गएका थिए । 

नेपालको प्रचलित कानूनअनुसार जन्मकैदको सजाय २० वर्षको हुने गर्छ ।