धनगढी – नेपाल कम्युनिस्ट पार्टी (नेकपा) अध्यक्ष पुष्पकमल दाहाल (प्रचण्ड)ले सरकार परिवर्तनबारे सञ्चारमाध्यममा आएजस्तो केही नभएको स्पष्ट पारेका छन् ।

शुक्रवार धनगढी विमानस्थलमामा आयोजित पत्रकार सम्मेलनमा बोल्दै अध्यक्ष प्रचण्डले सरकार परिवर्तनबारे कुनैपनि ठोस कुरा नभएको स्पष्ट पारेका हुन् । 

‘सर्वप्रथम त सरकार परिवर्तनको कुरा मलाई नसोधदिए हुन्थ्यो लाग्छ । प्रधानमन्त्रीको क्षेत्रधिकारको कुरा हो । उहाँले जे सोच्नुहुन्छ, त्यही हुन्छ’, उनले भने–‘पार्टी अध्यक्ष भएकोले सल्लाह त पक्कै गर्नुहुुन्छ । अहिले मिडियामा आएको छ नि, असाध्यै धेरै । लौ यति मन्त्री फेरिने भए रे, यो जाने भयो, त्यो आउने भयो रे । हामीबीचमा केही ठोस कुरा भएको छैन ।’ 

अध्यक्ष प्रचण्डले नेपाल र चीनबीचको सहमति ऐतिहासिक रूपमा सफल भएको दाबी गर्दै समझौताको वक्तव्यमा आउनेले मात्रै सबै कुरा निधो नगर्ने बताए ।

चीनसँगको सम्झौतामा सुदूरपश्चिमलाई उपेक्षा भयो भन्ने गुनासो बढेको छ नि ? भन्ने पत्रकारको जिज्ञासामा उनले अगाडि भने–‘पश्चिमको मुद्दालाई पनि सम्बोधन गर्नुपर्छ भनेर हिल्सा सुुर्खेततिर अलि बढी जोड भएकै हो । शुरूमा शी चिनफिङसँगको कुराकानीमा पश्चिममा कुनैपनि ठूलो परियोजना पर्दैन भनेर, त्यो चाहिँ परेको छ । अब सुदूरपश्चिमकै हकमा पनि केही परियोजना अगाडि बढ्छन् भन्ने मलाई लागेको छ । वक्तव्यमा आउनेले मात्रै सबै कुरा निधो गर्दैन ।’

अध्यक्ष प्रचण्डले अब सबैको ध्यान परिवर्तन र परिस्थितिमा गएको बताएका छन् ।

तीनै तहको सरकार बनिसकेपछि अबको चुनौती विकास निर्माण र समृद्धितिर जाने भएको बताउँदै उनले त्यसको आधारमा संविधान समेतले भने अनुसारको समाजवादको तयारीमा जाने उल्लेख गरे, जसलाई ऐतिहासिक अवसरको रूपमा लिनुपर्ने उनको भनाइ थियो ।

नेकपा सुदूरपश्चिम समितिद्वारा धनगढीमा आयोजित स्थानीय तहका प्रमुख र उपप्रमुखलाई लक्षित प्रशिक्षण कार्यक्रम सम्बोधनका लागि प्रचण्ड धनगढी आएका हुन् ।