प्रमुख सत्तारुढ दल नेपाल कम्युनिस्ट पार्टी (नेकपा) स्थायी समिति बैठकमा मुलुकको समसामयिक राजनीतिक घटनाक्रमदेखि सरकारको काम कारवाहीको समीक्षा र पार्टीको संगठनसम्मका धेरै विषयमा घनीभूत छलफल भयो । 

पार्टी केन्द्रीय कार्यालय धुम्बाराहीमा स्थायी समिति बैठक एक साता चल्यो । मंसिर २९ गतेदेखि शुरू भएको स्थायी समिति बैठक पुस ४ गते एक दिनबाहेक लगातार बस्यो । 

बिहान ११ बजे बैठक शुरू गर्ने र अपराह्न ३ देखि ४ बजेभित्र समापन गर्ने गरी लगातार ७ दिन बैठक चल्यो । 

बैठक चलेको दिन नेताहरूलाई पार्टी केन्द्रीय कार्यालयमै चिया नास्ताको व्यवस्था थियो । 

नेताहरूका लागि खाजाको मेन्यूमा नयाँ कुरा भने थिएन । 

कतिपय नेता सुगरका बिरामी रहेको भन्दै सबैलाई फाइदा हुने खाजा मेन्यूमा समावेश गरिएको थियो । 

‘हिजो–अस्ति दूधमा भिजाएको ओट्स (जौको चिउरा) र मह थियो । समापनको दिनमा भने चिकेन चिउरा, चना र दही थियो,’ एक स्थायी कमिटी सदस्यले लोकान्तरसँग भने, ‘दुईपटक ब्ल्याक टी वा ब्ल्याक कफीको व्यवस्था पनि थियो ।’

खाजा खाने बेलामा नेताहरूबीच हाँसो ठट्टा पनि चल्ने गर्थ्यो । आइतवारको बैठक समापनका क्रममा अध्यक्ष पुष्पकमल दाहाल प्रचण्डले ‘कमरेडहरू केही बोल्न भए अझै बैठक लम्ब्याउँ ?’ भनेर ठट्टा गरेका थिए । 

शुरूमा दुई दिनमै बैठक सम्पन्न गर्ने तयारी रहेको भएपनि सदस्यहरूले खुलेर आफ्नो धारणा राखुन् भनेर बैठक ७ दिन लम्ब्याउनु परेको प्रचण्डले बताए । 

बैठकको अन्तिम दिन प्रचण्डले झण्डै तीन घण्टा लामो समापन मन्तव्य राखेका थिए ।

पुस २३ गते काठमाडौंमा केन्द्रीय समितिको बैठक बोलाउने निर्णय गर्दै स्थायी समिति बैठक आइतवार समापन भएको थियो ।