गृहमन्त्री रामबहादुर थापा बादलले देशको शान्ति सुरक्षाको अवस्था आधारभूत रुपमा नियन्त्रणमा आएको बताएका छन् ।

प्रदेश स्तरीय सुरक्षा गोष्ठीमा सहभागि हुन सुर्खेत आइपुगेका गृहमन्त्री बादलले पत्रकारसँग कुराकानी गर्दै देशमा विप्लव समूहका सबै गतिविधि नियन्त्रणमा भने नआइसकेको बताए ।

‘अहिले आधारभूत रुपमा नियन्त्रणमा लिइरहेका छौं । कतिपय विप्लव समूहका कार्यकर्ता मूल धारको राजनीतिमा आइरहेका छन्,’ उनले भने, ‘संविधान नमान्ने तत्वलाई हामी नियन्त्रणमा लिइरहेका छौं । विगतको भन्दा अहिले शान्ति सुरक्षामा व्यापक मात्रामा सुधार भएको छ ।’

उनले देशमा शान्ति सुरक्षा नै समृद्धिको पहिलो आधार भएकाले राज्य व्यवस्थता तथा प्रणालीको विरोध गर्ने समूहलाई नियन्त्रणमा लिइने बताए । उनले देशमा यस्ता समूहलाई छिट्टै नियन्त्रणमा लिन सरकार सक्षम भएको बताए ।

कर्णाली प्रदेशका सबै प्रमुख जिल्ला अधिकारीहरु, सुरक्षा निकायका प्रमुखहरु, प्रदेश सरकारको आन्तरिक मामिला तथा कानून मन्त्रालयसमेतको सहभागिता रहेको उक्त कार्यक्रममा एमसीसिलाई सदनबाट नेपालको हितमा हुने गरी पारीत गरिने बताए ।

‘सम्झौतामा नै अमेरिकाको सिनेट र नेपालको प्रतिनिधि सभाबाट अनुमोदन गर्ने व्यवस्था राखिएको छ,’ गृहमन्त्री बादलले भने, ‘नेपालको हित विपरितका बुँदाहरु सुधार गर्दै सदनबाटै उक्त सम्झौता पारित हुन्छ । देशलाई असर पार्ने गरि कुनै पनि सम्झौता हुनेछैनन् ।’

उनले भारत र नेपालबीच नाकाबन्दीको बेलामा भएको तितो सम्वन्ध सुदृढ भएको बताए । यद्यपी लिपुलेकका बारेमा भारतले जारी गरेको नयाँ नक्साका कारण दुइ देशबिच केहि तिक्तता बढेतापनि कुटनीतिक माध्यमबाट समस्याको समाधान सरकारले खोजिरहेको बताए ।

गृहसचिव प्रेमकुमार राईले सुरक्षा निकायको कामको समीक्षा गरिने बताए ।

‘कार्यक्रममा गत वर्ष देखि अहिलेसम्मको स्थानीय सरकार, प्रदेश सरकारबीच भइरहेको समन्वय, शान्ति सुरक्षाको अवस्था आदिका विषयमा गम्भीर समीक्षा हुनेछ,’ उनले भने, ‘यसका अलावा आगामी दिनमा कसरी बढने भन्ने कुराको छलफल हुने छ ।’

उनका अनुसार कार्यक्रममा प्रदेशमा सुशासनको अवस्था, विकास निर्माणको अवस्था आदिका विषयमा व्यापक छलफल गरिनेछ । शुक्रबार देखि शुरूभएको उक्त कार्यक्रम आज शनिबार सम्पन्न हुनेछ ।