प्रधानमन्त्री केपी शर्मा ओलीले अमेरिकी सहयोग परियोजना मिलेनियम च्यालेञ्ज कर्पोरेसन 'एमसीसी'ले नेपालको सार्वभौमिकतामा कुनै किसिमको असर नगर्ने जिकिर गरेका छन् ।

बुधवारबाट काठमाडौंको राष्ट्रिय सभागृहमा शुरू भएको नेकपा केन्द्रीय कमिटीको बैठकलाई सम्बोधन गर्दै प्रधानमन्त्री ओलीले एमसीसी नेपालको हितअनुकूलकै सम्झौता भएको जिकिर गरेका हुन् ।

'यस (एमसीसी)मा कुनै अनुचित सम्झौता छैन,' प्रधानमन्त्री ओलीले भने, 'हाम्रो सार्वभौमिकतामा, हाम्रो स्वाधीनतामा, हाम्रो अन्तर्राष्ट्रिय सम्बन्ध, हाम्रो कुनैपनि कुरामा प्रतिकूल असर पार्ने स्थिति छैन, यसमा स्पष्ट रहन कमरेडहरूलाई म आग्रह गर्दछु ।'

नेकपा अध्यक्ष समेत रहेका प्रधानमन्त्री ओलीले एमसीसी अमेरिकाको इन्डो प्यासिफिक रणनीतिअन्तर्गत नभएको जिकिर पनि गरे ।

'५० देशसँग एमसीसी सम्झौता भइसकेको छ । एसिया, अफ्रिका र ल्याटिन अमेरिकाका देशहरू छन्,' प्रधानमन्त्री ओलीले भने, 'यसलाई इन्डो प्यासिफिकसँग जोड्नु बेकार हो, ल्याटिन अमेरिका पनि इन्डो प्यासिफिक ?'

प्रधानमन्त्री ओलीले सन् २००४ मा एमसीसीको स्थापना भएदेखि आजको स्थितिसम्म नेपाल र एमसीसीबीच भएका विभिन्न छलफल, वार्ता र सम्झौताहरू तिथिमिति सहित उल्लेख गरे ।

कुनैपनि सम्झौता गर्दा आफूले राष्ट्रको हितलाई केन्द्रमा राख्ने जिकिर समेत प्रधानमन्त्री ओलीले गरे ।

'कुनैपनि सम्झौता हाम्रो इन्ट्रेस्टमा, हाम्रो आवश्यकतामा, हाम्रो लाभका लागि गर्छौं,' प्रधानमन्त्री ओलीले भने, 'अरूका इन्ट्रेस्ट के छन् भनेर जाँदैनौं । अरूको इन्ट्रेस्ट के होला भनेर त्यसको विश्लेषण गरेर पनि जाँदैनौं ।'

एमसीसीसम्बन्धी सम्झौता यसअघि नै कार्यान्वयनमा गइसक्नुपर्ने भन्दै प्रधानमन्त्री ओलीले अनावश्यक विवाद र बहस सिर्जना गरिएको गुनासो गरे ।

'कार्यान्वयन हुनुअघि संसद्‍बाट अनुमोदन हुनुपर्ने भन्ने थियो, प्रोसेसमा छ,' ओलीले भने, 'अस्तिनै हुनुपर्थ्यो, अनावश्यक विवाद र बहस भए, खर्च थपियो ।'