समय–समयमा चर्चामा आइरहने पात्र हुन्, राजीव गुरुङ (दीपक मनाङे) । पाँचौंपटक मन्त्री बनेर ‘रेकर्ड’ कायम गरेका मनाङे खगराज अधिकारी नेतृत्वको सरकारमा भौतिक पूर्वाधार विकास तथा यातायात व्यवस्था मन्त्री छन् ।

भौतिक पूर्वाधार मनाङेले रोजेकै मन्त्रालय हो । गत चैत ५ मा सुरेन्द्रराज पाण्डे नेतृत्वको सरकारमा भौतिक मन्त्री बनेका मनाङेले त्यतिबेला भनेका थिए, ‘७० प्रतिशत बजेट भएको मन्त्रालय मैले ताकेको हुँ । मैले (ताकेको) कमाउनलाई होइन, चेताउनलाई हो ।’ 

२०७८ मा गण्डकीको खेलकुद मन्त्री हुँदा कर्मचारी कुटेर विवादमा आएका मनाङेले चैतमा चौथोपटक शपथ खाइसकेपछि आफूले काम कसरी पेल्ने देखाउने बताएका थिए । 

‘सबैभन्दा ठूलो भ्रष्टाचार पनि भौतिकमा हुन्छ । मलाई ४/५ दिनको समय दिनुहोस्, म कसरी पेल्छु’, उनले भनेका थिए । 

उतिबेलै चार/पाँच दिन समय मागेका मनाङेले भौतिकमा उत्पातै केही गर्न भने सकेका छैनन् । उनले २० दिनमा दुईपटक मन्त्रीको शपथ खान भ्याए । सामान्य निर्देशनमा नै उनको दैनिकी बितिरहेको छ । अघिल्लो कार्यकालमा उनले चारवटा निर्देशन दिएका थिए । 

मनाङेको सचिवालयले दिएको जानकारीअनुसार विस्तृत परियोजना प्रतिवेदन, ठेक्काका लागि सूचना प्रकाशनपूर्वका कार्यहरू, ठेक्का व्यवस्थापन र निर्माण व्यवस्थापनका विषयमा निर्देशन दिएका थिए । 

डीपीआर र फिल्डको वास्तविक अवस्थामा धेरै परिवर्तन आएमा परामर्शदातालाई नै जिम्मेवार तुल्याउने गरी नीति अवलम्बन गर्ने निर्णय उनको थियो । यस्तै, ठेक्का दिनका लागि विदेशीभन्दा स्वदेशी कम्पनीलाई प्राथमिकता दिन उनले निर्देशन दिएका थिए ।

असारे विकासलाई अन्त्य गर्न कात्तिक मसान्तभित्र बहुवर्षीय योजना स्वीकृत गरी सूचना प्रकाशन गर्ने व्यवस्था मिलाउन र बजेट अपुग भएमा माग गर्न पनि उनको निर्देशन थियो ।

घण्टे हाजिरीमा कर्मचारीको असन्तुष्टि

विभागीय निर्देशन दिँदै बसिरहेका मनाङेका सम्बन्धमा पछिल्लो समय चर्चामा आएको विषय हो, यातायातका कर्मचारीले घण्टा-घण्टामा हाजिरी गर्नुपर्ने निर्देशन । 

गत मंगलबार यातायात कार्यालय, पृथ्वीचोक पुगेका मनाङेले यातायातका कर्मचारीलाई प्रत्येक घण्टा हाजिरी गर्न निर्देशन दिएका छन् । 

सेवाग्राहीबाट गुनासो आएपछि अनुगमनमा पुगेको बताउँदै मन्त्री मनाङेले गुनासो नआउने गरी काम गर्न कर्मचारीलाई निर्देशन दिएका थिए ।

‘कर्मचारीबारे अलिकति 'कम्प्लेन' आएर म आएको हुँ । टाइममा आइदिएनन् भन्ने छ । त्यसका लागि हामीले टाइम मशिनजस्तो राखेका छौं । ८ घण्टामा प्रत्येक घण्टा 'थम्ब' गर्नुपर्छ, त्यसो गरेपछि उनीहरू ९ टु ५ बस्नैपर्‍यो,’ मनाङले भनेका थिए ।

उनको यो निर्णय र निर्देशनप्रति कर्मचारीहरू असन्तुष्ट छन् ।

यातायात कार्यालयका एक कर्मचारीले प्रत्येक घण्टा हाजिरी गर्न सम्भव नरहेको बताए । त्यसो गर्दा कामभन्दा हाजिरीतिर बढी ध्यान हुने उनको भनाइ छ ।

‘घण्टा–घण्टामा त के सम्भव होला, हाजिर मात्र गरेर बस्ने कि के गर्ने ? साध्ये हुँदैन । हाम्रो अफिसमा जनताले नै छड्के गरिरहेका हुन्छन् । लाइन लगाएर हाजिरी गर्दै गयो । हाजिर सकिएपछि फेरि अर्काको पालो आउने हुन्छ कि, कामभन्दा हाजिरीतिर बढी जोड हुन्छ कि,’ ती कर्मचारीले भने ।

यस्तै, यातायात व्यवस्था कार्यालय सवारी चालक अनुमति पत्र पोखराका प्रमुख जीतेन्द्रजंग केसी समयसँगै यसको असर देखिने बताउँछन् ।

‘८ बजेदेखि ५ बजेसम्म खोलिन्छ । एकवर्ष देखि ८ बजेदेखि खोलेका छौँ । परीक्षणको रूपमा रहेको छ । असर/प्रभाव हेरौँला । समयले कस्तो असर प्रभाव पार्छ सेवाप्रवाहमा भनेर हेर्नुपर्ने हुन्छ,’ उनले भने ।

पदबहाली गर्दा मनाङले विद्युतीय सवारी साधनलाई सार्वजनिक सवारी साधनको रूपमा दर्ता गर्दा तथा रुट प्रदान गर्दा विद्युतीय सवारी साधन बिक्रेताले अनिवार्य रूपमा मन्त्रालयले तोकेको कम्तीमा ३ जिल्लामा ‘फास्ट चार्जिङ’ स्टेसन खोल्नुपर्ने निर्णय गरेका थिए ।

साथै, उनले भौतिक पूर्वाधारसम्बन्धी काम अनुगमन गर्नका लागि केन्द्रीयस्तरको अनुगमन समिति गठन गर्ने निर्णय पनि गरेका थिए ।

मन्त्रालयमा खादामाला निषेध, बाहिर पिर्के सलामी !

मनाङेको कार्यकक्ष पस्नुअघि मन्त्रीको ‘नेम प्लेट’मुनि एउटा सानो सूचना देख्न सकिन्छ । उक्त सूचनामा भनिएको छ, ‘भेटघाटको क्रममा खादा तथा मालाका लागि कुनै पनि कष्ट नगर्नू ।’
 
मन्त्रालयमा भेट्न जाँदा खादा र माला समेत निषेध गरेका मनाङेले पिर्के सलामी लिएको भिडियो सामाजिक सञ्जालमा भाइरल छ ।

वैशाख ९ मा गण्डकी प्रहरी तालिम केन्द्र पोखरा– १५ छिनेडाँडामा उनले प्रहरीबाट पिर्के सलामी लिएका थिए ।