भारतीय राजदूतावासले आयोजना गरेको ‘पोस्ट इन्भेस्टमेन्ट समिट इन्डिया–नेपाल बीटूबी मिट’ सम्पन्न भएको छ ।

नेपाल लगानी बोर्ड र नेपाल–भारत उद्योग वाणिज्य संघसँगको सहकार्यमा मंगलवार काठमाडौंमा गरिएको कार्यक्रममा करिब ३५ जनाको सहभागिता थियो ।

कार्यक्रममा नेपाल–भारत उद्योग वाणिज्य संघकी अध्यक्ष सृजना राणाले भारत र नेपालको व्यापारबीच सहकार्यका लागि जलविद्युत्, पर्यटन र कृषि सम्भावना बोकेको क्षेत्रको रुपमा रहेको बताइन् ।

कार्यक्रममा मिलेनियम इन्डिया इन्टरनेशनल चेम्बर अफ कमर्स एन्ड इन्डस्ट्री (एमआईसीसीआईए)का अध्यक्ष राजदूत अनिल त्रिगुनायतले पछिल्लो द्विपक्षीय कनेक्टिभिटी पहलको सराहना गरे । भारत–नेपाल आर्थिक साझेदारीलाई अघि बढाउन बीटूबी कनेक्सनको महत्त्व रहेको उनको भनाइ थियो । 

यस्तै, लगानी बोर्डका उपसचिव रमेश अधिकारीले भारतीय लगानीकर्तालाई नेपालमा व्यापार गर्न आग्रह गरेका थिए ।

यही वैशाख १६ र १७ गतेको तेस्रो नेपाल लगानी सम्मेलनमा फलदायी छलफलमा सहभागी भएका कैयौं व्यक्तिगत व्यवसायका साथै एफआईसीसीआई, सीआईआई, आईसीसी र एमआईसीसीआईएका ५० भन्दा बढी सदस्यीय बलियो भारतीय प्रतिनिधिमण्डलको उनले प्रशंसा गरे ।​​​

बीटूबी बैठकमा नेपाल–भारत उद्योग वाणिज्य संघ र एमआईसीसीआईएबीच सहकार्यका लागि समझदारीपत्रमा हस्ताक्षरसमेत भएको छ ।

अर्थमन्त्री वर्षमान पुनले लगानी सम्मेलनको एकदिन अगाडि सार्वजनिक गरेको तेस्रो संस्करणको पुस्तिकाको प्रतिलिपि भारतीय प्रतिनिधिलाई उपलब्ध गराइएको थियो ।

सो पुस्तिका यहाँबाट डाउनलोड गर्न सकिन्छ ।