काठमाडौं– प्रमुख प्रतिपक्षी दलको नेताले संसद्मा सम्बोधन गर्दा प्रधामनन्त्री उपस्थित हुनुपर्ने संसदीय परम्परा नमानेको भन्दै नेपाली कांग्रेसका सभापति शेरबहादुर देउवाले प्रधामनन्त्री केपी शर्मा ओलीको आलोचना गरेका छन् । 

प्रतिनिधि सभाको बुधवारको बैठकमा सभामुखसँग समय मागेर बोलेका देउवाले अन्तिममा प्रधानमन्त्री ओलीले पहिलेदेखि चल्दै आएको परम्परा तोड्ने काम गरेको आरोप लगाएका हुन् । 

‘जहाँ पनि प्रधानमन्त्री बोल्दा विपक्षी नेता आउनुपर्छ, विपक्षी नेता बोल्दा प्रधामनन्त्री आउनुपर्छ । तर यहाँ उनले जहिले पनि हेप्ने काम गरेका छन्,’ देउवाले आक्रोशित मुद्रामा भने, ‘यो पनि हामी कुनै हालतमा मान्दैनौं सभामुख महोदय! नेपालमा पहिलेदेखि चल्दै आएको चलनलाई तोड्ने काम गरेका छन् ।’ 

देउवाले मिडिया काउन्सिल विधेयक, सूचना प्रविधि विधेयक र मानव अधिकार आयोग विधेयक लोकतन्त्रको मूल्य मान्यता विपरीत आएको भन्दै कुनै हालतमा पारित गर्न नदिने बताए । ‘यी विधेयकको विरोधमा हामी हिजोभन्दा सशक्त भएर आउछौँ,’ देउवाले भने । 

सरकार सर्वत्र असफल भएको दाबी गर्दै उनले थपे, ‘एउटा विप्लवलाई कन्ट्रोल गर्न सकेको छैन, गर्छ अरू कुरा !’