दलितलाई शवदाहगृह उपलब्ध गराइएन, पुलबाट खसाएर अन्तिम संस्कार गर्न बाध्य

भदौ ५, २०७६

काठमाडौं – भारतको तमिलनाडु राज्यस्थित भेल्लोरमा दलिहरूमाथिको भेदभावको विकराल घटना सार्वजनिक भएको छ । 

पलार नदीको किनारमा दलितको शवको दाहसंस्कार गर्न अनेकौं बाधा तेर्स्याउने गरिएको छ । दाहसंस्कारअघि उनीहरूले २० फीट अग्लो ओभरब्रिजबाट शवलाई तल खसाउनुपर्ने हुन्छ । अनि तल पुगेर अन्तिम संस्कार गर्नुपर्छ । 


ADVERTISEMENT

बुधवार दलित समाजका मानिसले एक शवलाई पुलबाट नदीमा खसाएका छन् । नारायणपुरम दलित कोलोनी निवासी कुप्पनको सडक दुर्घटनामा ज्यान गएको थियो । त्यसपछि समाजका अनेकौं मानिसको उपस्थितिमा उनको शव पलार नदी किनारमा दाहसंस्कारका लागि ल्याइएको थियो । 

अन्तिम संस्कारका लागि सबै रीतिरिवाजपछि नदी किनारमा पुलबाट डोरी लगाएर कुप्पनको शव झुण्ड्याइयो र दाहसंस्कार गरियो । पुल बनेपछि नदीको किनारमा रहेको जमीनमा कथित उच्च जातिका मानिसले कब्जा जमाए । त्यसपछि उनीहरू कुनै पनि दलितलाई त्यहाँ आउनै दिँदैनन् । 

कुप्पनका भतिजा विजय भन्छन्, ‘हामीहरू शवदाह गराउन आएका थियौं । तर गार्डले हामीलाई भित्र आउने अनुमति दिएनन् । कुनै विवाद नहोस् भनेर हामीले पुलबाट नै शव खसाउन उचित ठान्यौं ।’

दलित कोलोनीका कृष्णन भन्छन्, ‘गाउँमा शवदाहका लागि पर्याप्त स्थान छैन । यस्तो हुँदा गाउँका मानिस नदी किनारमा नै शवदाह गर्छन् । तर हामीलाई त्यसको अनुमति दिइएन । बाध्य भएर हामीले शवलाई पहिला पुलबाट खसाउनुपर्छ । अनि मात्र हामी अन्तिम संस्कार गर्न पाउँछौं । विगत चार वर्षदेखि हामीहरू यसरी नै दाहसंस्कार गरिरहेका छौं ।’

दलित समाजले प्रशासनलाई यस विषयमा हस्तक्षेप गर्न माग गरेको छ । भेल्लोर कलेक्टर एएस सुन्दरमले घटनाको अनुसन्धान भइरहेको छ र प्रतिवेदनको आधारमा उचित कारवाही गरिने बताए ।

एजेन्सी
 

भदौ ५, २०७६ मा प्रकाशित

प्रतिक्रिया दिनुहोस

ताजा समाचार