धनगढी उपमहानगरपालिकाले गर्न लागेको विकास सम्मेलनबारे जानकारी दिन आयोजित पत्रकार सम्मेलनलाई धनगढीका पत्रकारले बहिष्कार गरेका छन् । 

निर्धारित समयभन्दा १ घण्टा ढिलो भएपनि आयोजक धनगढी उपमहानगरपालिकाका कुनै पनि जिम्मेवार पदाधिकारी उपस्थित नभएपछि पत्रकार सम्मेलन स्थलबाट पत्रकार बाहिरिएका हुन् ।

मंगलवार बिहान ११ गते हुने भनिएको पत्रकार सम्मेलन १२ बजेसम्म पनि शुरू नगरिएपछि पत्रकार सम्मेलनस्थलबाट बाहिरिएको पत्रकारले जनाएका छन् ।

‘हामीले कार्यक्रम बहिष्कार गरेको होइन । हामीलाई ११ बजे बोलाइयो, १२ बजेसम्म कुर्‍यौं तर त्यहाँ न कार्यकारी अधिकृत देखिए, न मेयर साप आए, न उपमेयर । कुनै पनि रेस्पोन्सिबल पर्सन हलभित्र नदेखिएपछि हामी बाहिरिएका हौं । हामी कति कुर्ने ? कम्तीमा हामी ३० जना पत्रकारहरू थियौं । पत्रकारको पनि आफ्नो समय हुन्छ नि ?’ अन्नपूर्ण दैनिकका सुदूरपश्चिम ब्यूरो प्रमुख शिवराज भट्टले भने, ‘तर उपमहानगरपालिकाको कार्यक्रम बहिष्कार गर्ने, कुनै व्यक्ति वा संस्थालाई बहिष्कार गरिएको होइन । अब हुने कार्यक्रमहरू चाहिँ समयमै शुरू हुन् भन्नको लागि सन्देश पनि दिन जरुरी छ र विद्यमान मान्यतालाई तोड्नलाई पनि सबै पत्रकारहरू सल्लाह गरेर बाहिर आयौं ।’

नागरिक दैनिकका संवाददाता पुष्पराज जोशीले उपमहानगरपालिकाले आफ्नै कार्यक्रमप्रति जवाफदेहिता नदेखाएको बताए । घण्टौं कुराएर पनि कोही नआएपछि बाहिरिएको बताउँदै उनले आउँदो दिनमा धनगढी उपमहानगरपालिकाले मात्रै होइन, अन्य निकायले पनि समयको महत्त्वलाई बुझ्नुपर्नेमा जोड दिए ।

धनगढी उपमहानगरपालिकाले धनगढीको विकासको मुद्दा पहिल्याउन तथा योजनाबद्ध रुपमा विकासको गति अगाडि बढाउन विकास सम्मेलन गर्ने जनाएको छ तर त्यसबारे जानकारी गराउन आयोजित पत्रकार सम्मेलनमा समयको ख्याल नै नगरिएपछि पत्रकार रुष्ट भएर बाहिरिएका थिए ।

केर्नी न्यूज डटकमकी सम्पादक उन्नती चौधरीले नगरपालिकाले आफैंले आयोजना गरेको पत्रकार सम्मेलनलाई बेवास्ता गरेको बताउँदै आउँदा दिनमा कुनै पनि निकायले समयको ख्याल गर्नुपर्ने बताइन् । उनले भनिन्, ‘जहिले पनि नेपाली समय नेपाली समय भनेर जिम्मेवार व्यक्तिहरू आफ्नो दायित्वबाट पन्छिने परिपाटी छ, जुन ठीक होइन । अर्को कुरा पत्रकारहरू फाल्तु हुन् भनेर कसैले नसोचून् ।’ 

उपमहानगरपालिकाका प्रमुख प्रशासकीय अधिकृत नारायणप्रसाद सापकोटाले मेयर नृपबहादुर वड काठमाडौं गएको र उपमेयर पनि बाहिर रहेकाले पत्रकार सम्मेलन प्रभावित भएको जिकिर गरे तर उनी स्वयं बिहान ११ बजे उपमहानगरपालिकामा थिएनन् ।

नगरपालिकाका जनप्रतिनिधि र कर्मचारीबीच पनि समन्वयको अभाव देखिएको छ । विकास सम्मेलनबारे जानकारी दिन आयोजित पत्रकार सम्मेलनबारे उपमहानगरपालिकाका प्रवक्ता सन्तोष मुडभरी बेखबर थिए । कार्यक्रमबारे न त कार्यपालिकामा छलफल भएको छ, न त कुनै विस्तृत जानकारी नै आफूलाई रहेको उनले बताए ।

धनगढी उपमहानगरपालिकाले केही साताअघि नै पत्रकार सम्मेलन गरेर फागुन १८ गते विकास सम्मेलन गर्ने घोषणा गरेको थियो । सम्मेलनमा दातृ निकायमाझ नगरको भौतिक, सामाजिक, आर्थिक र वातावरणीय विकासका योजनालाई परियोजना बैंकका रूपमा प्रस्तुत गरिने जनाइएको छ ।

धनगढीलाई सुविधासम्पन्न शहरका रूपमा विकास गर्न एउटा ‘मेगा प्रोजेक्ट’ ल्याउने तयारी भइरहेको नगरपालिकाले जनाएको छ ।