प्रमुख सत्तरुढ दल नेपाल कम्युनिस्ट पार्टी 'नेकपा'को सचिवालय बैठक निष्कर्षविहीन बनेको छ ।

बुधवार साँझ बालुवाटारमा बसेको बैठक यही वैशाख २० गते अर्को बैठक बस्नेगरी टुंगिएको छ ।

बैठकमा पार्टीका आन्तरिक समस्या, स्थायी कमिटी बैठकलगायतका विषयमा छलफल भएको पार्टी प्रवक्ता नारायणकाजी श्रेष्ठ 'प्रकाश'ले जानकारी दिए ।

'पार्टीभित्रको आन्तरिक समस्या, पार्टी एकताको सुदृढीकरणको महत्त्व, सरकार र केही कमरेडहरूले माग गर्नुभएको स्थायी कमिटी बैठकसहित विविध पक्षबारे गम्भीर विचार विमर्श भयो,' बैठकपछि प्रवक्ता श्रेष्ठले भने, 'पार्टी नेतृत्वले अनौपचारिक छलफल अघि बढाउँदै २० गते पुन: सचिवालय बैठक बस्ने निर्णय भएको छ ।'

स्थायी कमिटी बैठकबारे पनि सचिवालयको आगामी बैठकले निर्णय लिने प्रवक्ता श्रेष्ठले बताए ।

पार्टी अध्यक्ष एवं प्रधानमन्त्री केपी शर्मा ओली र उनीइतर समूहबीचको विवाद उत्कर्षमा पुगेका बेला बसेको सचिवालय बैठकलाई निकै महत्त्वका साथ हेरिएको थियो ।

पार्टी सचिवालयका बहुमत सदस्य प्रधानमन्त्री ओलीले तत्काल राजीनामा दिनुपर्ने अडानमा छन् । दुई विवादास्पद अध्यादेशका कारण चर्किएको विवाद त्यसलाई फिर्ता गरिसके पनि टरेको छैन ।

ओलीले प्रधानमन्त्री र अध्यक्षमध्ये कम्तिमा एक पद नछाड्दासम्म चुप नलाग्ने रणनीतिमा उनीइतर पक्ष देखिन्छ ।

पार्टी अध्यक्ष पुष्पकमल दाहाल 'प्रचण्ड', वरिष्ठ नेता झलनाथ खनाल र माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ 'प्रकाश'लगायत एक ठाउँ देखिएका छन् ।

पार्टी सचिवालय बैठकअघि प्रधानमन्त्री ओलीले आफूपक्षीय सांसदहरूलाई बुधवार बालुवाटारमा भेला गरे ।

संसदीय दलमा आफ्नो बहुमत सिद्ध गरेर राजीनामा माग्नेहरूको मुख थुन्ने प्रधानमन्त्रीको रणनीति छ ।

अर्को पक्ष भने सबै समस्या सचिवालय तथा स्थायी कमिटी बैठक बसेर हल गर्नुपर्ने अडानमा छ ।

पार्टीका यी दुवै कमिटीमा अल्पमतमा रहेकाले ओली आफू तुलनात्मकरूपमा बलियो रहेको संसदीय दलमा बहुमत सिद्ध गर्ने कसरतमा छन् ।

बालुवाटारमा सचिवालय बैठक बसिरहँदा पत्रकारहरूलाई भने बाहिर रोडमा नै रोकिएको थियो ।