बुटवलस्थित लुम्बिनी प्रादेशिक अस्पतालले कर्मचारी, नर्स र डाक्टरलाई बोक्न दुई वटा आफ्नै गाडी किनेर सञ्चालनमा ल्याएको छ। 

लकडाउनका कारण सार्वजनिक यातायात नचल्दा टाढाबाट आउने कर्मचारीले सास्ती भोग्दै आएका थिए। पश्चिम नवलपरासीको सुनवल, भैरहवा र सालझण्डी तीन ठाउँबाट कर्मचारी ल्याउन/पुर्याउन दुई वटा गाडी सञ्चालनमा ल्याएको हो। 

अस्पताल विकास समितिका अध्यक्ष सूर्यबहादुर भट्टराईले ६२ लाख रुपैयाँमा दुई वटा गाडी खरिद गरी सञ्चालनमा ल्याइएको बताए। उनले भने, ‘टाढाका कर्मचारी लकडाउनको समयमा समस्यमा परे। आफ्ना साधन नहुनेलाई त झनै समस्या भयो। त्यसैले अस्पतालले कर्मचारी र स्वास्थ्यकर्मीलाई अस्पताल ल्याउन र घरसम्म पुर्याउनका लागि गाडी किनिएको हो।’ 

अस्पतालमा ६ सय कर्मचारी कार्यरत छन्। अस्पतालकी नर्सिङ इन्चार्ज ज्योति पौडेलले गाडी सञ्चालनमा आएपछि कर्मचारीलाई सहज हुने बताइन्। 

अस्पतालले लकडाउनकै समयमा ओपिडी सेवा सुरु गरेको छ। त्यस्तै अस्पतालमा आउने संकास्पद विरामीका लागि कोरोना जाँच गर्न पीसीआर मेसिन पनि सञ्चालनमा ल्याइएको छ।