कोरोना महामारीबीच पोखरामा सडक महोत्सव : थामिएनन् दर्शक, अपेक्षाभन्दा बढी भीड

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

कोरोना महामारीको बेवास्ता गर्दै हजारौं मानिस पोखरा सडक महोत्सवमा रमाएका छन् ।

अंग्रेजी नयाँ वर्ष सन् २०२१ को अवसरमा आयोजित २२औं पोखरा सडक महोत्सवमा न्यु इयर इभ मनाउन पोखरासहित विभिन्न ठाउँबाट गएराति लेकसाइडमा आन्तरिक पर्यटकको घुइँचो लागेको थियो । 


Advertisement

विगतमा जस्तो आतिसबाजी यसपालि नभए पनि उनीहरूले आपसमा शुभकामना साटासाट गर्दै मध्यरातमा फेवाताल किनारबाट नयाँ वर्षको भव्य स्वागत गरे । 

गत वर्षदेखि शुरू कोभिड– १९ को प्रभाव १० महिनायता पनि कायमै रहेका बेला आयोजित महोत्सवमा मानिसको ठेलमठेल भीड देखिन्थ्यो ।


Advertisement

अधिकांशले मास्क लगाएका भए पनि भीडमा कोभिड–१९ संक्रमण हुन नदिन पर्याप्त सावधानी देखिँदैन थियो । फेवाताल किनारको शहीद चोकदेखि हल्लनचोक हुँदै डिहिकोपाटनसम्म मानिसको लर्को थियो । 

ठाउँ–ठाउँमा आयोजित सांगीतिक कार्यक्रममा मानिसहरू झुम्मिएका देखिन्थे । करीब ३ किमी क्षेत्रफलमा भएको महोत्सव नेपालमै सबैभन्दा ठूलो क्षेत्रफलमा आयोजना हुने महोत्सव हो । 

आयोजक रेष्टुरेन्ट एण्ड बार एसोसिएसन (रेवान), पोखराका अध्यक्ष लक्ष्मण बरालले आफूहरूले सोचेभन्दा बढी दर्शक आएको बताए ।

उनले भने, ‘विषम परिस्थितिका कारण यति धेरै सडक नै भरिने गरी दर्शक आउनुहुन्छ होला भन्ने लागेको थिएन, तर सोचेभन्दा बढी आउनुभयो । रेष्टुरेन्ट तथा होटलहरू करीब ७०/८० प्रतिशत भरिभराउ थिए ।’
उनका अनुसार करीब ३०/४० हजार दर्शकले महोत्सवको अवलोकन गरेका छन् । 

मानिसको अत्यधिक भीडले कोरोना भाइरसको संक्रमण पनि उत्तिकै बढायो होला नि भन्ने जिज्ञासामा दर्शक स्वयं सचेत भइसकेको अवस्थामा उनीहरूलाई मास्क र स्यानिटाइजर प्रयोग गर्न भनिएको तथा सडकका ठाउँठाउँमा कोभिड–१९ विरुद्ध सचेतनामूलक बोर्ड राखिएकाले संक्रमण खासै नफैलिएको दाबी अध्यक्ष बरालले गरे ।   

विगतमा जस्तो महोत्सवले निरन्तरता नपाउने आशंकाबीच जिल्ला प्रशासन कार्यालयले स्वास्थ्य सचेतना अपनाउँदै महोत्सव गर्न अनुमति दिएपछि आयोजक  उत्साहित भएका थिए । 

विगतमा ५ दिनसम्म हुने गरेको महोत्सव छोट्ट्याएर ३ दिनसम्म मात्र सञ्चालन गरिएको हो । मुख्यमन्त्री पृथ्वीसुब्वा गुरुङले बुधबार औपचारिक रूपमा उद्घाटन गरेको सडक महोत्सव शुक्रवारसम्म चल्नेछ । 

सडकमै नाचौं, सडकमै खाऔं, सडकमै रमाऔं नाराका साथ आन्तरिक एवं बाह्य पर्यटन प्रबर्द्धनका लागि रेवानले हरेक वर्ष यो महोत्सव आयोजना गर्दै आएको छ ।

महोत्सवमा खानाका विभिन्न परिकार सडक किनारमा कुर्सी टेबुल उतारेरै ग्राहकलाई पस्किने गरिन्छ भने विभिन्न सांगीतिक कार्यक्रम हुने गर्दछन् । 

विजय उत्सव
विजय उत्सव

लेखकबाट थप...

कमेन्ट गर्नुहोस्