नेपाल कम्युनिस्ट पार्टी (नेकपा) प्रचण्ड–नेपाल समूहका प्रवक्ता नारायणकाजी श्रेष्ठले प्रधानमन्त्री केपी शर्मा ओलीले संसद विघटन गरेर एकैपटक दोहोरो प्रहार गरेको बताएका छन् ।

नेपाल बुद्धिजीवी संगठनले बिहीवार आयोजना गरेको अन्तर्क्रियामा बोल्दै नेकपा प्रवक्ता श्रेष्ठले संसद विघटन गरेर ओलीले संविधान तथा लोकतन्त्र र कम्युनिस्ट आन्दोलनमाथि एकैपटक प्रहार गरेको बताए ।

प्रधानमन्त्री ओलीले गैरकम्युनिस्ट, सर्वसत्तावादी, निरंकुश चरित्र देखाइरहेको प्रवक्ता श्रेष्ठले बताए । ‘सामान्य अवस्थामा गैरसंवैधानिक विघटनलाई सर्वाेच्च अदालतले खारेज गरिदिने भएकाले हामी चुप लागेर बस्दा पनि हुन्थ्यो । तर आन्दोलन र संघर्ष गरिरहेका छौं,’ प्रवक्ता श्रेष्ठले भने, ‘अहिलेको संविधानलाई कायम राख्ने कि संविधान मार्ने भन्ने विवाद छ नेपालको राजनीतिमा । तसर्थ हामीले संघर्ष गर्नुपरिरहेको छ ।’

प्रतिगामी षड्यन्त्र सफल हुन नदिने गरी संघर्ष आवश्यक रहेको श्रेष्ठले बताए ।