निर्माता तथा निर्देशक सन्तोष सेन मुम्बई पुगेको लामै समय भइसकेको छ । उनी एक महिनाको अन्तरमा ३ पटक मुम्बई जाने आउने गरे ।

अभिनेता प्रदिप खड्कासँग एक महिनाअघि मुम्बई पुगेका उनी त्यसपछि भने एक्लै गुपचुप रुपमा चलचित्र ‘प्रेम गीत ३’ को काममा लागिरहेका छन् । खासमा उनी यति मुम्बईमा यति लामो समय बस्नुको कारण भने ‘प्रेम गीत ३’को बलिउड प्रदर्शन हो ।

केहि समय अघि उनको प्रतिक्षारत चलचित्र ‘प्रेम गीत ३’ बलिउडमा बिक्री भएको खबरले नेपाली चलचित्र उद्योगमा अहिले पनि राम्रै चर्चा चलेको छ ।
अघिल्लो चैत २८ मा प्रदर्शन हुने भनिएको यो चलचित्र कोरोना महामारीका कारण प्रदर्शन मिति स्थगित गरिएको थियो । अब यो चलचित्र कहिले प्रदर्शन हुन्छ निर्णय भइसकेको छैन ।
उनको यो चलचित्र शाहरुख खानको ब्यानरले किनेको हल्ला चलेको भएपनि त्यो अझै सन्तोष सेनको टिमले आधिकारिक रुपमा पुष्टि गरेको छैन । तर, बलिउडमा विक्री भएको खबर भने लगभग पक्का रहेको उनी निकट स्रोतको भनाई छ ।
निर्माता सेन हिन्दीसँगै विभिन्न ५ भाषामा प्रदर्शन गर्ने गरी मुम्बईमा काम गरिरहेको उनी निकट एक स्रोतको भनाई छ । 
चलचित्रमा शिव श्रेष्ठ, सुनिल थापा, प्रदिप खड्का, मनिष राउत, कृष्टिना गुरुङ, क्रिजन गौतम, प्रेम पुरी लगायतका कलाकारको अभिनय देख्न सकिन्छ । 
आसुसेनफिल्म प्रोडक्सनले यदि यो चलचित्र बलिउडबाट पनि देखाउने अवसर पायो भने यो चलचित्र नेपाली चलचित्र इतिहासमा सबैभन्दा धेरै आम्दानी गर्ने चलचित्र बन्ने छ ।

काठमाडौं र मनाङमा खिचिएको यो चलचित्रलाई अर्का निर्देशक छेतेन गुरुङले लेखेका थिए । तर, उनको केहि समय अघि निधन भएको छ । साढे ३ करोडको हाराहारी खर्च गरेर निर्माण गरिएको यो चलचित्र नेपाली चलचित्र उद्योगमा सबैभन्दा प्रतिक्षारत चलचित्र हो ।