पाटन उच्च अदालतले आर्थिक वर्ष २०७७/०७८ को असार मसान्तसम्म ४१ अर्ब रूपैयाँ बिगो बापतको जरिवाना फैसला गरेको छ । 

वार्षिक कार्य प्रतिवेदन सार्वजनिक गर्दै आज (शुक्रवार) राजस्व चुहावट अन्तर्गतका १२ वटा फैसलाबाट ४१ अर्ब चार करोड तीन लाख ६३ हजार रूपैयाँ राजस्व संकलन हुन बाँकी रहेको पाटन उच्च अदालतका रजिष्ट्रार गजेन्द्रबहादुर सिंहले बताए ।

यो आर्थिक वर्षमा ५८ वटा नयाँ मुद्दा र जिम्मेवारी सरेका ७१ वटा गरी १२९ वटा राजस्वका मुद्दामध्ये १२ फैसला गरेको छ भने अझै ११७ वटा मुद्दा बाँकी छन् । 

ती मुद्दामा ५१६ प्रतिवादीमध्ये २५१ स्वदेशी र १८ जना विदेशी गरी २६९ प्रतिवादी हाजिर हुन आएको र १६ विदेशीसहित २४७ प्रतिवादी अझै पनि फरार रहेको रजिष्ट्रार सिंहले पत्रकार सम्मेलनमा जानकारी दिए ।

उच्च अदालत पाटनले यो आर्थिक वर्षमा लिएको लक्ष्यको ५४.४९ प्रतिशत मात्रै लक्ष्य हासिल गरेको छ । 

‘कोरोना भाइरसको दोस्रो संक्रमणका बीच पनि हामीले यति लक्ष्य हासिल गरेका हौँ,’ रजिष्ट्रार सिंहले भने, ‘यो वर्ष ७० प्रतिशतसम्म काम गर्ने लक्ष्य लिएका थियौं ।’

अघिल्लो वर्षबाट जिम्मेवारी सरेको ६ हजार ९९१ वटा र नयाँ दर्ता भएका ६ हजार ९८३ गरी १३ हजार ९३२ मुद्दामध्ये ६ हजार ३६६ वटा मुद्दाको फैसला गरेको छ भने ७ हजार ६०८ मुद्दा अर्को आर्थिक वर्षलाई सरेको छ ।

शुरू क्षेत्राधिकार (पुनरावेदनबाट सरेको) चार हजार ९७२ मध्ये दुई हजार २२३ वटा मुद्दा फर्छ्यौट गरेको छ, जसमा दुई हजार ७४९ वटा मुद्दा अघिल्लो वर्षलाई सरेकोे छ । 

१३ वटा अदालतबाट पुनरावेदन भएका सात हजार ६४० मध्ये तीन हजार ४३७ वटा मुद्दा फर्छ्यौट गरेको छ । रिट निवेदनका एक हजार ३६२ मुद्दा मध्ये ४१८ मुद्दा फैसला गरेको बाँकी अर्को वर्षलाई सरेको सिंहले पत्रकार सम्मेलनमा बताए ।

उच्च अदालत पाटनमा ६ महिनाभित्रका २७५, ६ महिनादेखि एक वर्षसम्मका एक हजार ९७५, एक वर्षदेखि १८ महिनासम्मका एक हजार ९९८, १८ महिनादेखि दुई वर्षसम्मका एक हजार ४७१ र दुई वर्ष नाघेका ६४७ वटा मुद्दा फर्छ्यौट भएका छन् ।

धेरै फैसला गर्ने न्यायाधीश कुलप्रसाद शर्मा

उच्च अदालत पाटनमा आर्थिक वर्ष २०७७÷०७८ मा सबभन्दा धेरै न्यायाधीश कुलप्रसाद शर्माले मुद्दा फर्छ्यौट गरेका छन् ।

उनले एक वर्षमा ६५८ वटा मुद्दा फछ्र्यौट गरेको रजिष्ट्रार ज्ञानेन्द्रबहादुर सिंहको भनाइ छ । 

यस्तै ६४७ वटा न्यायाधीश किरण पौडेल, ६४३ माधवप्रसाद पोखरेल, ६३४ महेश शर्मा पौडेल र ५४२ वटा निलम पौडेलले मुद्दा फर्छ्यौट गरेको उच्च अदालत पाटनले जनाएको छ ।

अदालतले फैसलाको ढाँचामा एकरुपता ल्याउनका लागि समिति गठन गरेर र फैसलाको तपसिल खण्डमा एकरुपता ल्याउन छलफल गरेर प्रतिवेदनसमेत सार्वजनिक गरेको रजिष्ट्रार सिंहले बताए ।

नेवारी र तामाङ भाषाको ट्रान्सलेटर

भाषाको समस्या देखिएपछि नेवारी र तामाङ भाषाको ट्रान्सलेटर राख्ने निर्णय गरिएको छ । 

‘वृद्धवृद्धालाई भाषाको समस्या देखिएकाले त्यसलाई समाधान गर्न यस वर्षबाट ट्रान्सलेटर राख्न थालेका छौं,’ सिंहले भने, ‘नेवारी भाषामा ब्रोसर छापेर सेवा सुविधाको बारेमा समेत जानकारी दिएका छौं ।’

कोरोना भाइरस संक्रमणले बिरामी भएका उच्च अदालत पाटनअन्तर्गतका अदालतका कर्मचारी र न्यायाधीशहरूलाई स्वास्थ्यमा सहजीकरण गर्न उपरजिष्ट्रारको नेतृत्वमा सम्पर्क व्यक्ति तोकेर कोरोनाको उपचार गरेको रजिष्ट्रार सिंहले बताए ।

यस्तै अदालतलाई प्रविधिमैत्री बनाउनका लागि सफ्टवेयरमार्फत् पनि काम गर्दै आएको छ । अहिलेसम्म एक लाख ५६ हजार ९१२ वटा मिसिल अभिलेख गरिएको छ, जसमध्ये यो वर्ष मात्रै ६ हजार ८० मिसिल सफ्टवेयरमा इन्ट्री गरिएको छ । जम्मा एक लाख ५५ हजार २१२ मिसिल सफ्टवेयरमा इन्ट्री गरेको अदालतले जनाएको छ ।

कोरोनाले दुई न्यायाधीशको मृत्यु

उच्च अदालत पाटनअन्तर्गतका १३ वटा अदालतका १२६ जनालाई कोरोना संक्रमण देखिएको छ । दुई जना न्यायाधीशले ज्यान गुमाएका छन् । 

यसै वर्ष काठमाडौं जिल्ला अदालतका एक जना र जिल्ला अदालत धादिङका एक जना न्यायाधीशले ज्यान गुमाएको पाटन अदालतले जनाएको छ ।