वरिष्ठ नेता माधव नेपाललगायत केही नेताले नयाँ पार्टी खोलेपछिको अवस्थाको समीक्षा गर्न नेकपा एमाले स्थायी कमिटीको बैठक शुरू भएको छ । 

तुलसीलाल स्मृति प्रतिष्ठानको कार्यालय च्यासल ललितपुरमा मंगलवार दिउँसो बैठक शुरू भएको हो । बैठकमा माधव नेपालको साथ छाडेका स्थायी कमिटी सदस्यहरू सहभागी भएका छन् । 

१० बुँदे सहमति कार्यान्वयन र पार्टीलाई जेठ २ को अवस्थामा फर्काउनु पर्ने माग राख्दै आएका स्थायी कमिटी सदस्यहरू आजको बैठकमा सहभागी छन् । 

अध्यक्ष केपी शर्मा ओलीको बालकोटस्थित निवासमा सोमवार भएको छलफलमा पार्टीलाई जेठ २ को अवस्थामा फर्काउने सहमति भएको थियो । 

सहमतिसँगै उपाध्यक्षत्रय भीम रावल, युवराज ज्ञवाली र अष्टलक्ष्मी शाक्य, उपमहासचिव घनश्याम भुसाल तथा सचिवत्रय गोकर्ण विष्ट, योगेश भट्टराई र भीम आचार्य मंगलवारको बैठकमा सहभागी भएका छन् । 

स्थायी कमिटी सदस्य रघुजी पन्त, अनुशासन आयोगका अध्यक्ष अमृत बोहोरा पनि आजको बैठकमा सहभागी भएका छन् । 

सर्वोच्च अदालतको फैसलाले गत फागुन २३ गते नेकपा एमाले ब्युँतिएपछि आज पहिलो पटक सबै पदाधिकारीसहितको बैठक बसेको हो । 

बैठकले केही नेताहरूको जिम्मेवारी हेरफेर गर्ने सम्भावना छ । अष्टलक्ष्मी शाक्य माधव नेपाल समूहमा लागेपछि बागमती प्रदेशको इन्चार्जको जिम्मा रामबहादुर थापालाई दिइएको थियो । 

यस्तै सुदूरपश्चिम प्रदेश इन्चार्जको जिम्मा लेखराज भट्टलाई दिइएको थियो । 

नेताहरूको जिम्मेवारी हेरफेरको तयारी भएको स्रोतले बतायो ।