२ नम्बर प्रदेश र लुम्बिनी प्रदेशका २२ जना घुमुवा प्रहरी कारवाहीमा परेका छन् । 

प्रहरी प्रधान कार्यालयले केही समयअगाडि प्रदेश नम्बर २ मा प्रहरी प्रधान कार्यालय अन्तर्गतको विषेश ब्यूरोका एसएसपी टेकप्रसाद राई र प्रहरी प्रधान कार्यालयकै एसएसपी भीम ढकाललाई लुम्बिनी प्रदेशमा सुक्ष्म अनुसन्धानका लागि पठाएको थियो ।

त्यही अध्ययनको निष्कर्षका आधारमा प्रहरी नायब निरीक्षकदेखि जवानसम्मका सादा पोशाकका प्रहरी (घुमुवा प्रहरी)लाई कारवाही स्वरुप २० कार्य दिन आचरण सुधार तालिम र अनुसन्धान भइरहेको प्रहरी हेडक्वार्टर स्रोतले जानकारी दियो ।

प्रहरीको उच्च स्रोतका अनुसार आर्थिक अनियमितता, गैर व्यावसायिक आचरण, माथिल्लो निकायबाट निगरानी र निर्देशनको अवज्ञासम्बन्धी प्रश्न प्रतिवेदनमा उठाइएको थियो भने सीमा नाकाहरूमा एउटै व्यक्तिलाई लामो समयसम्म सादा पोशाकमा घटाउँदा समस्या देखिएको पनि उल्लेख थियो ।

त्यसैका आधारमा प्रहरी प्रधान कार्यालयले २२ जनालाई आचरण सुधार गर्न कारवाही स्वरुप तालिममा राखेको र थप अनुसन्धान गरिरहेको छ । 

त्यसका साथै त्यही अनुगमनको प्रतिवेदन अनुसार गैर व्यावसायिक आचरण गर्ने सर्लाहीका १ जना कार्यालय प्रमुखलाई प्रहरी प्रधान कार्यालय तानेर स्पष्टीकरण समेत सोधेको स्रोतले लोकान्तरलाई जनाकारी दियो ।

अन्य प्रहरीहरूलाई पनि अनुसन्धान गरिरहेको र गल्ती कमजोरी देखिएमा कारवाही गर्ने समेत प्रहरी हेडक्वार्टरले जनाएको छ ।

के छ २७ बुँदे निर्देशनमा ?

प्रदेश कार्यालयहरू, विभिन्न प्रहरी कार्यालय, प्रहरी प्रधान कार्यालयमा मौखिक उजुरी र विभिन्न सामाजिक सञ्जालमा सादा पोशाकका घुमुवा प्रहरीको आचरण र आर्थिक अनियमिता भएको गुनासो आएपछि प्रहरी प्रधान कार्यालयले दशैंअगाडि प्रदेश २ र लुम्बिनी प्रदेशमा प्रहरी वरिष्ठ उपरीक्षकको टोली पठाएको थियो ।

उनीहरूले दिएको प्रतिवेदनका आधारमा प्रहरी प्रधान कार्यालयले ७ वटै प्रदेशमा २७ बुँदे निर्देशन दिएको छ ।

२७ बुँदे निर्देशनमा सीमा क्षेत्रमा ६/६ महिनामा घुमुवा प्रहरीको पूरै टोली परिर्वतन गर्ने उल्लेख छ । जसमा प्रदेश, जिल्ला र इलाकाबाट खटिएका सबै सादा पोशाकका प्रहरीलाई बदली गर्न निर्देशन दिइएको छ ।

सिनियर प्रहरी अधिकृतको कमाण्डमा टास्क बेसको आधारमा कार्यालय प्रमुख वा तोकिएको अधिकारीले उनीहरूलाई नियमित अनुगमन र सुरपरीवेक्षण गर्न पनि निर्देशन दिइएको छ । साथै कार्यसम्पादनको आधारमा दण्ड र पुरस्कार गर्न पनि निर्देशन दिइएको छ ।

सीमा क्षेत्रमा हुने अवैध चोरी तस्करीका विरुद्धमा गतिविधि रोक्न कडा कारवाही गर्ने र मातहतका कमाण्डरहरूलाई उच्च नैतिकतामा बस्न अभियान चलाउन प्रहरी हेडक्वार्टरले भनेको छ । 

तराईका अधिकांश प्रहरी कार्यालयहरूमा सरसफाई नभएको पाइएकाले जिल्ला प्रमुखले आफैँ गएर त्यसमा विषेश ध्यान दिन, ब्यारेक लेआउट, कर्मचारी टर्न आउट, अनिवार्य ड्युटी र फौजी संस्कार लागू गर्ने निर्देशन दिएको प्रहरी हेडक्वार्टर स्रोतले बताएको छ ।

आर्थिक अनियमितताका गुनासाहरू धेरै आएकाले त्यसलाई विषेश अनुगमन गर्न पनि कार्यालय प्रमुखलाई निर्देशन दिइएको छ ।