ऊर्जा, जलस्रोत तथा सिँचाइमन्त्री एवम् नेकपा माओवादी केन्द्रकी स्थायी कमिटी सदस्य पम्फा भुसालले पार्टीको आगामी राष्ट्रिय अधिवेशनले देशलाई नेतृत्व दिने गरी राजनीतिक कार्यदिशा तय गर्ने बताएकी छिन् । 

माओवादी केन्द्र महालक्ष्मी नगर कमिटी अधिवेशनको शनिवार उद्घाटन गर्दै नेतृ भुसालले आगामी सम्मेलनबाट माओवादीले देशलाई समाजवादमा लैजाने बाटो तय गर्ने बताएकी हुन् । 

‘हाम्रै अगुवाईमा आज देशले परिवर्तन देखेको छ, यदि हामीले बनाएको बाटोमा एमाले नआएको भए आज उनीहरूको पार्टी पतन भइसक्थ्यो । अहिले उनीहरू तीनवटा पार्टीमा चिरा परिसकेका छन्’, भुसालले भनिन्, ‘अब हुने निर्वाचनमा हाम्रो पार्टीले देशको नेतृत्व लिनेमा म आशावादी छु ।’ 

कार्यक्रममा मन्त्री भुसालले दुई जना भाइरल जोडी बिनयजंग बस्नेत पद्यमतीलाई पार्टी प्रवेश गराइन् । 

शनिवार नै ललितपुरमा गोदावरी नगर अधिवेशन उद्घाटन गर्दै मन्त्री भुसालले माओवादी पार्टी अझै सुदृढ र क्रान्तिकारी बनेर जाने बताइन् ।

‘हाम्रो पार्टी गरिब तथा दुःखी र सर्वहारा वर्गको हितमा सदैव काम गर्न क्रियाशील छ, २१ औं शताब्दी अनुरुपको समाजवाद निर्माण गर्न आफूहरू मुलुकभर सम्मेलनमार्फत उत्रिएका छौँ,’ उनले भनिन् । 

मन्त्री भुसालले शनिवार नै ललितपुर महानगर अधिवेशनलाई सम्बोधन गर्दै नेकपा एमालेले विचार र विधिलाई प्राथमिकतामा नराखी केपी ओलीको ब्यक्तिबादी सोचलाई मात्र अघि सारेको टिप्पणी गरिन् । 

भिडियोमा हेर्नुहोस्