मौसममा आएको खराबीका कारण बुधवार आन्तरिक वायुसेवाका ७४ उडान रद्द भएका छन् ।

मंगलवार रातिदेखि नै परेको वर्षातका कारण बुधवार बिहानैदेखि मौसमअनुकूल नभएका कारण दिनभर उडान ढिलो हुने र रद्द हुने क्रम चलिरहेको छ । 

त्रिभुवन विमानस्थल कार्यालयका अनुसार काठमाडौैंबाट हुने र प्रादेशिक उडानसमेत अधिकांश रद्द भएका छन् । 

विमानस्थल कार्यालयका अनुसार सबैभन्दा बढी बुद्ध एयरको ४० वटा उडान रद्द भएको छ । यति एयरलाइन्सको १६ वटा उडान रद्द भएको छ । 

बुधवार तय भएका वायुसेवाको उडानमा गुण एयरलाइन्सको ६ वटा, समिटको र ताराको ३/३ वटा, निगमको दुई वटा र सौर्य एयरलाइन्सको एक उडान रद्द भएको छ । 

श्री एयरलान्सको भने ५ बजेसम्ममा एक उडान रद्द भएको र अझै ५ वटा उडान ढिलो भएर बसेका छन् । यो वायुसेवाका अनुसार अब उडान नहुने अवस्था नभएको  अन्य सबै वायुसेवाका ४ बजेपछिको सबै उडान उडान रद्द भएकोले श्रीको पनि रद्द नै हुने भएका छन् । 

यसका चालक दलले निर्णय दिएपछि मात्रै औपचारिकरुपमा निर्णय हुने पनि यो वायुसेवाले जानकारी दिएको छ ।

सम्बन्धित वायुसेवाले दिएको जानकारीअनुसार बुधवार काठमाडौंबाट पोखरा र पोखराबाट हुने प्रादेशिक उडान सबै रद्द भएका छन् । काठमाडौंबाट उडान तय भएका सबैभन्दा बढी उडान पोखराको रद्द भएको छ । 

यो गन्तव्यमा बुद्धको १० वटा र यतिको ५ वटा उडान तय भएकोमा सबै रद्द भएको छ । अन्य वायुसेवाको पनि पोखराको उडान रद्द भएको छ । 

काठमाडौैंबाट उडान हुने विराटनगर, भैरहवा, जनकपुर, सिमरा, नेपालगन्ज, तुम्लिङटारसहितको गन्तव्यको उडान रद्द भएको सम्बन्धित वायुसेवा कम्पनीले जानकारी दिएका छन् ।