राणाले अध्यक्षता गरेको बैठकमा वरिष्ठतम् न्यायाधीश कार्की सहभागी, टुंगिएको हो न्यायाधीशहरूको भद्र अवज्ञा ?

सर्वोच्च अदालतका वरिष्ठतम् न्यायाधीश दीपककुमार कार्की प्रधानन्यायाधीश चोलेन्द्र शमशेर जबराले अध्यक्षता गरेको न्याय सेवा आयोगको बैठकमा उपस्थित भएका छन् ।

चोलेन्द्रसँग बेञ्च शेयर र कुनै औपचारिक फोरममा सँगै उपस्थित नभएका कार्की न्याय सेवा आयोगको बैठकमा सहभागी भएपछि सर्वोच्चको भद्र अवज्ञा आन्दोलन एक हिसाबले अन्त्य भएको देखिएको छ ।

कार्कीसहित सर्वोच्चका कुनै पनि न्यायाधीशले लामो समयदेखि जबरासँग बेञ्च वा औपचारिक फोरम शेयर गरेका थिएनन् ।

आयोगको आजको बैठकले न्याय सेवाका उपसचिव र सहसचिव तहका कर्मचारीको बढुवाका लागि सिफारिश गरेको छ ।

आयोगका प्रवक्ता मानबहादुर कार्कीका अनुसार आजको बैठकमा पाँचै जना सदस्यहरू उपस्थित भएका थिए।

‘बैठकमा न्याय सेवा आयोगका पाँचैजना सदस्य उपस्थित हुनुभएको थियो,’ प्रवक्ता कार्कीले लोकान्तरसँग भने, ‘न्याय सेवाका उपसचिव र सहसचिवको बढुवाको एउटा एजेन्डा र लोक सेवा आयोगबाट केही सिफारिश भएर आएका उपसचिवहरूको सिफारिश तथा पदस्थापनसम्बन्धी निर्णय भएको छ ।’

आयोगमा प्रधानन्यायाधीश जबरा र वरिष्ठतम् न्यायाधीश कार्कीका अलावा कानून, न्याय तथा संसदीय मामिला मन्त्री दिलेन्द्रप्रसाद बडु, लोक सेवा आयोगका अध्यक्ष माधवप्रसाद रेग्मी र महान्यायाधिवक्ता खम्मबहादुर खाती सदस्य छन् ।