प्रदेश १ सरकारले मन्त्रालय टुक्र्याउने निर्णय गरेपछि नेकपा एमालेले त्यसको विरोध गरेको छ । नेकपा एमाले प्रदेश १ ले मंगलवार प्रेस वक्तव्य जारी गर्दै सरकारको निर्णयप्रति आपत्ति जनाएको हो । 

भएकै मन्त्रालय धान्न नसक्ने अवस्था रहिरहेका बेला अहिलेको सरकारले दोब्बर मन्त्रालय बढाउने निर्णय गरेको भन्दै एमालेले विरोध जनाएको छ । 

पुँजीगत खर्चभन्दा साधारण खर्च धेरै भएकोमा थप मन्त्रालय बढाएर प्रदेशले धान्नै नसक्ने आर्थिक भार पार्न खोजेको प्रदेश कमिटी अध्यक्ष तुलसीप्रसाद न्यौपानेद्वारा हस्ताक्षरित विज्ञप्तिमा उल्लेख गरिएको छ । 

एमालेले मन्त्रालयहरू थप गर्ने निर्णय तुरुन्त फिर्ता लिनसमेत माग गरेको छ । 

‘बजेट अभाव भएका कारणले धेरै महत्त्वपूर्ण योजना अलपत्र भएको अवस्थामा प्रदेश सरकारका ६ वटा मन्त्रालयलाई बढाएर १२ वटा मन्त्रालय खडा गर्ने सरकारको निर्णय औचित्य पुष्टि गर्न नेकपा एमाले गठबन्धन सरकारलाई सम्झाउन चाहन्छ,’  विज्ञप्तिमा भनिएको छ । 

यस्तै मुलुकको ढुकुटीमा ब्रम्हलुट मच्चाउने, जनताको ढाड सेक्ने गरी संघीय लोकान्तान्त्रिक गणतन्त्रलाई बदनाम गराउन अहिलेको सरकार लागिपरेको एमालेले आरोप लगाएको छ । 

प्रदेश सभाबाट पारित योजनाहरू खारेज गरिएको, योजनाहरूमा विनियोजित बजेट कटौती गरिएको, विकासका काम ठप्प पारेकोलगायतका आरोपसमेत एमालेले लगाएको छ । भ्रष्टाचारसमेत बढाएको भन्दै गठबन्धन सरकारको एमालेले आलोचना गरेको छ ।