प्रदेश १ का निवर्तमान मुख्यमन्त्री तथा नेकपा एमाले संसदीय दलका नेता भीमप्रसाद आचार्यले प्रदेश सरकार हराएको आरोप लगाएका छन् । 

शुक्रवार संसद् सचिवालयमा पत्रकार भेटघाटमा बोल्दै उनले ३ महिना बित्दा पनि प्रदेश सरकार नदेखिएकोले खोजी गर्न थालेको बताएका हुन् । 

गत कात्तिक १६ गते आचार्यले राजीनामा दिएपछि राजेन्द्र राई मुख्यमन्त्री बनेका थिए । कोरोनाको महामारीका बेला पनि सरकार भने कुम्भकर्ण निदाए जसरी निदाएकाले सरकार कहाँ छ भनेर खोजी गर्न थालेको उनको भनाइ छ । 

प्रदेश १ सरकारले मन्त्रालयको संख्या बढाएर १२ पुर्‍याएकोमा समेत उनले विरोध जनाएका छन् । उनले भागबन्डा मिलाउन मन्त्रालय फुटाएर जनताले तिरेको करमा गठबन्धन सरकार रमाएको समेत आरोप लगाए । 

प्रदेश सभाले पारित गरेको नीति कार्यक्रम कार्यान्वयन गर्न किसानलाई सुलभ तरिकाले मल, बीउ उपलब्ध गराउन तथा राजस्व नीतिमा सुधार ल्याउँदै बजेटको आकार दोब्बरले वृद्धि गरी विकास र राहत अभियानलाई आफू नेतृत्वको सरकारले ल्याए पनि यो सरकार आएर घटाएको आरोप उनले लगाए ।

सरकारको १०० दिन पुगोस् भनेर प्रमुख प्रतिपक्षी दल नेकपा एमाले चुपचाप वसेको उनको भनाइ छ । अनियमितता बढेको भन्दै उनले प्रदेश सरकारलाई अनियमितता रोक्नसमेत माग गरे । 

‘नेकपा एमाले संसदीय दल सरकारको यस्तो जनविरोधी रवैयाको निन्दा र भत्र्सना गर्दछ र यस्ता कामहरू अविलम्ब रोक्न तथा बाढीपहिरोपीडित जनताको राहतको निम्ति अघिल्लो सरकारले गरेका निर्णयहरू कार्यान्वयन गर्न आह्वान गर्दछ,’ उनले जारी गरेको विज्ञप्तिमा भनिएको छ ।