मिलेनियम च्यालेन्ज कर्पोरेसन (एमसीसी) विरुद्ध सडक प्रदर्शनमा सहभागी भएकाहरूमाथि सरकारले निगरानी गरिरहेको बताएको छ ।

मंगलवार गृह मन्त्रालयले विज्ञप्ति प्रकाशन गरेर एमसीसीविरुद्ध सडक प्रदर्शनमा सहभागीको गम्भीरतापूर्वक निगरानी गरिरहेको बताइएको छ ।

‘केही समूहबाट सडकमा प्रदर्शन गर्ने र सामाजिक जीवनलाई अवरोध पुर्‍याउने कामहरू भएका छन् । हिंसात्मक घटनामा संलग्न व्यक्तिहरू छानबिनको क्रममा समेत रहेका छन्,’ गृह मन्त्रालयका सहप्रवक्ता फणिन्द्रमणि पोखरेलले जारी गरेको विज्ञप्तिमा उल्लेख छ । 

फागुन ८ गतेको प्रदर्शनको क्रममा पूर्व प्रधानमन्त्री केपी शर्मा ओली चढेको गाडीमा प्रदर्शनकारीले ढुंगा हानेका थिए । विज्ञप्तिमा भनिएको छ, ‘फागुन ८ गते आफ्नो निवासबाट संसद भवन आउने क्रममा पूर्व प्रधानमन्त्री चढेको सवारीसाधनमा अवरोध पुर्‍याउने र ढुंगा प्रहार गर्नेसम्मको हर्कत देखिएको छ । यस्ता हिंसात्मक घटनामा संलग्न व्यक्तिहरू छानबिनको क्रममा समेत रहेका छन् ।’

प्रदर्शनको क्रममा सुरक्षाकर्मीले उच्च संयमता अपनाएको विज्ञप्तिमा भनिएको छ ।