प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीचको छलफल सकिएको छ । 

प्रधानमन्त्री निवास बालुवाटारमा दुई नेताबीच एमसीसी अनुमोदनसम्बन्धी विवाद र गठबन्धनका बारेमा छलफल भएको हो । 

स्रोतका अनुसार प्रचण्डले एमसीसी पनि टुंगोमा पुग्ने र गठबन्धन पनि जोगिने प्रस्ताव देउवासमक्ष राखेका छन् । 

एमसीसी निर्णयार्थ प्रस्तुत हुँदा माओवादी र एकीकृत समाजवादीका सांसदले बैठक बहिष्कार गर्ने र उपस्थितिको बहुमतले पारित गर्ने विकल्पमा छलफल भएको स्रोतको दाबी छ ।

अर्कातर्फ कांग्रेस महामन्त्री गगन थापाले प्रस्ताव गरेजस्तै एमसीसीमा अमेरिकाले दायाँबायाँ गरे तत्काल खारेज गर्ने संकल्प प्रस्ताव संसदबाट पारित गर्न सकिने विकल्प पनि गठबन्धनका नेताहरूले शीर्ष नेताद्वयलाई सुझाएका छन् ।

छलफलमा प्रधानमन्त्री र प्रचण्डसँगै कांग्रेसका केही नेता र माओवादीका तर्फबाट अर्थमन्त्री जनार्दन शर्मा समेत सहभागी थिए ।

प्रचण्ड गठबन्धन जोगाउने मध्यमार्गी प्रस्ताव लिएर प्रधानमन्त्री शेरबहादुर देउवालाई भेट्न बालुवाटार पुगेका थिए ।

बालुवाटारमा उनीहरूबीच करीब एक घण्टा संवाद भएको थियो । छलफल सकेर प्रचण्ड निस्किएको प्रधानमन्त्रीको सचिवालयले बताएको छ । 

नेकपा माओवादी केन्द्रको केन्द्रीय कार्यालयको बैठकमा छलफलपछि तयार भएको प्रस्ताव प्रधानमन्त्रीलाई जानकारी गराउन प्रचण्ड बालुवाटार पुगेका थिए ।

प्रचण्डसँगको संवादपछि कांग्रेस नेताहरू आन्तरिक छलफलमा जुटेको प्रधानमन्त्री सचिवालयले जनाएको छ ।