अभिनेता पल शाहविरुद्ध पीडित नाबालिग गायिकाका बुबाले नवलपुरमा पनि जाहेरी दर्ता गराएका छन् । उनले इलाका प्रहरी कार्यालय नवलपुरमा जाहेरी दर्ता गराएका हुन् । 

जाहेरीमा नाबालिग छोरीलाई मायाप्रेम गरेको, विभिन्न झुटा नाटक गरी जबर्जस्ती करणी गरेकाले पूर्ण विक्रम शाह भनिने पल शाहलाई मुलुकी अपराध संहिता २०७४ को दफा २१९ (१) विपरीतको कसुर आधारमा कारबाही गर्न माग गरिएको छ । यस्तै सोही संहिताको २२८ बमोजिम क्षतिपूर्तिसमेत भराइदिनसमेत माग गरिएको छ । 

पीडित नाबालिग गायिकाका बुबाले छोरीमाथि पलले जबर्जस्ती मदिरा खुवाएर बलात्कार गरेको आरोप लगाएका छन् । 

जाहेरीमा २०७७ चैत ७ गते राति गैँडाकोट नगरपालिका-७ स्थित गैँडाकोट रिसोर्टमा बलात्कार गरेको उल्लेख गरिएको छ ।

गत बुधवार मात्रै पलविरुद्ध तनहुँमा जाहेरी दर्ता भएको छ । पल आफैंले आइतवार प्रहरीमा आत्मसमर्पण गरेका छन् ।