नेपाली कांग्रेसका केन्द्रीय सदस्य तथा पूर्व उपप्रधानमन्त्री प्रकाशमान सिंहले आसन्न स्थानीय तह निर्वाचनलाई लक्षित गरी घरदैलो अभियानलाई तीब्र बनाउन पार्टीका नेता तथा कार्यकर्तालाई निर्देशन दिएका छन् । 

सोमवार कांग्रेस बागमती प्रदेश कार्यसमितिको हेटौंडास्थित कार्यालय उद्घाटन समारोहलाई सम्बोधन गर्दै नेता सिंहले मतदाताको घर–घरमा पुगेर उनीहरूको सुखदुःखमा सरिक हुँदै आवश्यक सुझाव समेत संकलन गर्न सके मात्रै जनताको विश्वास र मत दुवै प्राप्त हुने बताए ।

‘स्थानीय निर्वाचन नजिकिएको छ । हामी जनताको घरआँगनमा पुग्न सकेका छौं कि छैनौं ? म राम्रो उम्मेदवार हुँ मैले जितिहाल्छु भनेर बसेर हुँदैन है ! जनताको बीचमा पुग्न सक्नुपर्छ । उनीहरूको अवस्था कस्तो छ ? जनहितमा पार्टीले के गर्न सक्छ ? जनताको हामीप्रति असन्तुष्टिहरू छन् कि ? कांग्रेसले सुधार्नुपर्ने पो केही छ कि ? यी सबै विषयमा गम्भीर हुनु आवश्यक छ ।’

सरकारले निर्वाचनको मिति तय गरिसकेको अवस्थामा पनि केहीमा अझै चुनाव हुँदैन कि भन्ने शंका देखिएकाले दोधारमा नपर्न उनले आग्रह गरे ।

‘सरकारले निर्वाचनको मिति तोकिसकेको छ, निष्पक्ष ढंगबाट निर्वाचन गराउन सरकार तयारी अवस्थामा छ तर केही मानिसहरूमा निर्वाचन तोकिएको समयमा नहुने हो कि भन्ने शंका रहेको पनि देखियो । तोकिएकै मितिमा निर्वाचन हुने, म विश्वास दिलाउन चाहन्छु । हामी विधि र प्रक्रिया अनुसार चल्ने पार्टी हौं, चुनाव हुन्छ ।’ 

चुनावी गठबन्धनको विषयमा विभिन्न स्तरबाट केन्द्रीय कार्यसम्पादन समितिले सुझाव संकलन गरिरहेको र सोही आधारमा एउटा निष्कर्षमा पुगिने उनले स्पष्ट पारे । ‘धेरै सुझावहरू आएका छन्, कसैले निर्वाचनमा एक्लै जानुपर्छ भन्नुभएको छ, केहीले गठबन्धन नगरी हुँदैन भन्नुभएको छ । पार्टीको आन्तरिक सुझाव अनुसार नै अघि बढ्ने हो । गठबन्धन हुने नहुने वा आवश्यकता अनुसार हुने भन्ने विषय केही दिनभित्रै केन्द्रीय कार्यसम्पादन समितिले टुंगोमा पुर्‍याउँछ,’ सिंहले भने ।

कार्यक्रममा कांग्रेसबाट बागमती प्रदेश सरकार र प्रदेश सभामा प्रतिनिधित्व गरेका मन्त्री तथा सांसदहरू प्रदेश कार्यसमितिका पदाधिकारी तथा सदस्यहरू, १३ वटै जिल्लाका सभापति लगायत पार्टीका विभिन्न तह र तप्काका नेता तथा कार्यकर्ताको उपस्थिति रहेको थियो ।