प्रधानमन्त्री शेरबहादुर देउवाले आगामी अप्रिल १ देखि छिमेकी मुलुक भारतको औपचारिक भ्रमण गर्ने भएका छन् ।

देउवाले चैत १८ देखि भारतको औपचारिक भ्रमण गर्न लागेको परराष्ट्र मन्त्रालय स्रोतले बतायो । 

प्रधानमन्त्रीको भारत भ्रमणको औपचारिक घोषणा नेपाल सरकारले गरेको छैन । भारतीय सञ्चार माध्यमहरूले भने देउवाको भ्रमण तयारीका समाचार लेखेका छन् । 

चिनियाँ विदेशमन्त्री वाङ यीको नेपाल भ्रमण सकिएलगत्तै देउवाले भारत भ्रमण गर्ने तयारी गरेका हुन् ।

‘भ्रमणको आन्तरिक तयारी भइरहेको छ, औपचारिक घोषणा हुन बाँकी छ’ स्रोतले भन्यो । 

यसअघि भारतीय प्रधानमन्त्री नरेन्द्र मोदीको प्रदेश गुजरातमा हुने ‘भाइब्रेन्ट गुजरात’ सम्मेलनमा सहभागी हुन देउवा पुस २५ मा भारत जाने तयारी भएको थियो । कोरोना संक्रमणका कारण सो कार्यक्रम स्थगित गरिएपछि देउवाको भ्रमण पनि स्थगित भयो ।

भारतीय पत्रिका द हिन्दूले देउवाले आगामी साता भारतको भ्रमण गर्न लागेको समाचार बिहीवार लेखेको छ ।

‘प्रधानमन्त्री बनेपछि पहिलोपटक नेपालका प्रधानमन्त्री शेरबहादुर देउवाले अप्रिल १ र २ मा भारत भ्रमण गर्ने स्रोतहरूले पुष्टि गरेका छन् । भ्रमणमा द्विपक्षीय सम्बन्धका अलावा चीन र अमेरिकासँगको सम्बन्धका विषयमा पनि कुराकानी गरिनेछ,’ द हिन्दू पत्रिकाका कूटनीतिक सम्पादक सुहासिनी हैदर र अनन्त कृष्णनले समाचारमा उल्लेख गरेका छन् ।

द्विपक्षीय सम्बन्धमा कुराकानी हुनु सामान्य कुरा भए पनि सार्वभौम सत्तासम्पन्न मुलुक नेपालले अर्को मुलुकसँग राख्ने सम्बन्धका विषयमा भारतले चासो लिनुलाई अर्थपूर्ण रूपमा हेरिएको छ । 

पाँचौपटक प्रधानमन्त्री बनेपछि देउवाको यो पहिलो भारत भ्रमण हुनेछ । यसअघि देउवाले बेलायतको भ्रमण गरेका थिए ।