सरकार नेतृत्वकर्ता दल नेपाली काँग्रेसले आसन्न स्थानीय तह, प्रदेश र संघीय निर्वाचनमा सत्ता गठबन्धन दलबीच तालमेल गर्ने/नगर्ने विषयमा आज निर्णय गर्दैछ । 

अपराह्न तीन बजेपछि बस्ने केन्द्रीय समिति बैठकले तालमेलबारे निर्णय लिने नेताहरुले बताएका छन् । ११ चैतयता जारी बैठकमा सदस्यहरुबाट निर्वाचनमा तालमेल गर्ने वा एक्लै लड्ने भन्नेबारे परस्पर विरोधी विचार प्रकट भएका थिए । 
पार्टी सभापतिसमेत रहेका प्रधानमन्त्री शेरबहादुर देउवा पक्षधर केन्द्रीय सदस्यले सत्ता गठबन्धनबीच चुनावी तालमेलका पक्षमा धारणा राखेका छन् भने शेखर कोइराला समूहका नेताले एक्लै चुनावमा होमिनुपर्ने पक्षमा जोड दिएका छन् । 
सत्ता गठबन्धन आवद्ध नेकपा माओवादी केन्द्र र नेकपा एकीकृत समाजवादीले तालमेलबारे छिटो निर्णयमा पुग्न देउवालाई दबाब दिँदै आएका छन् । माओवादी अध्यक्ष पुष्पकमल दाहाल ‘प्रचण्ड’ र समाजवादी अध्यक्ष माधवकुमार नेपालसँग देउवाले तीनै तहमा चुनावी तालमेल हुनेमा ढुक्क रहन आश्वासन दिँदै आएका छन् ।

पछिल्ला सार्वजनिक कार्यक्रमहरुमा देउवाले काँग्रेस एक्लै चुनावमा जाँदा पराजित हुने भन्दै गठबन्धन दलबीच तीनै तहको निर्वाचनमा चुनावी सहकार्य हुने अभिव्यक्ति दिँदै आएका छन् । 

केन्द्रीय समितिमा सहज बहुमतमा रहेका देउवाले चुनावी तालमेलको पक्षमा संस्थागत निर्णय गराउने सम्भावना छ । भारत भ्रमणअघि नै निर्वाचनमा तालमेलको निर्णय गराउने पक्षमा देउवा छन् । समकक्षी नरेन्द्र मोदीको निमन्त्रणामा देउवा शुक्रवार भारत भ्रमणमा जाँदैछन् ।