सरकारको नेतृत्वकर्ता दल नेपाली कांग्रेसले वैशाख ३० गते हुने स्थानीय तह निर्वाचनका लागि वैशाख ११ गते चुनावी घोषणापत्र सार्वजनिक गर्ने भएको छ ।

महामन्त्री गगन थापा नेतृत्वको घोषणापत्र तयारी समितिले लोकतन्त्र दिवसको अवसर पारेर वैशाख ११ गते घोषणापत्र सार्वजनिक गर्ने तयारी गरेको हो । 

महामन्त्री थापाको अध्यक्षतामा बिहीवार घोषणापत्र तयारी समितिको बैठक पार्टी केन्द्रीय कार्यालय सानेपामा बसेको थियो । 

‘लोकतन्त्र दिवसको अवसर पारेर वैशाख ११ गते घोषणापत्र सार्वजनिक गर्नेगरी तयारी गरिरहेका छौं,’ नेपाली कांग्रेसका एक केन्द्रीय सदस्यले लोकान्तरसँग भने । 

त्यो दिन निर्वाचन आयोगले उम्मेदवारी मनोनयनको कार्यक्रम राखेको छ । 

कांग्रेसका ती केन्द्रीय सदस्यले वैशाख १२ गते देशभर एकैदिन उम्मेदवारी मनोनयन गर्नेगरी आन्तरिक तयारी रहेको बताए ।

वैशाख ११ गते उम्मेदवारी मनोनयन गर्दा १२ गते असन्तुष्टले बागी उम्मेदवारी दिने खतरा रहेकाले भोलिपल्ट उम्मेदवारी मनोनयन गर्ने तयारी भएको हो ।

फेसबूकदेखि टोलफ्रीबाट सुझाव दिन सकिने

नेपाली कांग्रेसले स्थानीय तहमा ‘च्याम्पियन’ हुने किसिमले घोषणा पत्र बनाउने भन्दै गृहकार्य थालेको छ ।

महामन्त्री थापा नेतृत्वको समितिले चुनावी घोषणापत्रबारे सबै स्थानीय तहका पार्टी समितिबाट सुझाव संकलन गर्ने निर्णय गरेको छ । यस्तै समितिले विषय विज्ञहरूसँग पनि छलफल र परामर्श गर्ने भएको छ । 

कांग्रेस केन्द्रीय सदस्य अजयबाबु सिवाकोटीले सबै पक्षको सुझावसहित स्थानीय आवश्यकतासहितको घोषणा पत्र बनाउने बताए । 

‘घोषणापत्र आम जनताले बुझुन् र ड्याम्मै कांग्रेसमा भोट हालुन् भन्ने गरी तयारी भइरहेको छ,’ सिवाकोटीले लोकान्तरसँग भने । 

उनका अनुसार सर्वसाधारणले कांग्रेसको घोषणापत्रका लागि निःशुल्क टेलिफोन (टोल फ्री) मार्फत सुझाव दिन सक्नेछन् । 

‘सामाजिक सञ्जाल र टोल फ्रीबाट समेत सुझाव दिन सकिने गरी युनिट बनाउँदैछौं,’ सिवाकोटीले लोकान्तरसँग भने, ‘एकदुई दिनमै टोल फ्री नम्बर सुचारू गर्छौं ।’

कांग्रेसले आफूले जितेका स्थानीय तहले गरेका कामको वार्षिक मूल्यांकन गर्नेगरी घोषणापत्रमै केही इन्डिकेटरको व्यवस्था गर्ने भएको छ ।

केन्द्रले तयार गरेको फरम्याटमा कांग्रेसको स्थानीय समितिले त्यहाँको वस्तुस्थिति समेटेर प्रतिवद्धता पत्र सार्वजनिक गर्न सक्नेछन् । 

चुनावी घोषणापत्र तयारी समितिमा डा. आरजु देउवा, डा. गोविन्द पोखरेल लगायत छन् । नेकपा एमालेले वैशाख ९ गते पार्टी स्थापना दिवसको अवसरमा घोषणापत्र सार्वजनिक गर्ने तयारी गरेको छ ।