नेकपा एमालेका उपाध्यक्ष एवं पूर्व अर्थमन्त्री विष्णु पौडेलले वर्तमान सरकारले लिएको गलत नीतिका कारण देशको अर्थतन्त्र अप्ठेरो स्थितिमा पुगेको बताएका छन् । 

कोभिडको अवस्थामा पनि केपी ओली नेतृत्वको सरकारले अर्थतन्त्रलाई बचाइराखेको उनको दाबी छ ।

देशको अर्थतन्त्रको अवस्थाबारे जानकारी गराउन आयोजित पत्रकार सम्मेलनमा उपाध्यक्ष पौडेलले प्रधानमन्त्री र मन्त्रीले दाबी गर्दैमा देशको अर्थतन्त्र सुध्रिने अवस्थामा नरहेको बताएका हुन् । 

अर्थतन्त्रलाई गतिशील र चलायमान बनाउन पूर्ववर्ती सरकारले सही नीति लिए पनि वर्तमान सरकारको गलत नीतिका कारण अर्थतन्त्र जोखिमपूर्ण अवस्थामा आएको उनले बताए । 

‘पूर्ववर्ती केपी ओली सरकारले स्वस्थ्य र सुदृढ अर्थव्यवस्था छाडेर गएको थियो । यो सरकारले जस्तो नीति लिएको छ, अर्थतन्त्र जोखिमको बाटोबाट गुज्रेको छ,’ पौडेलले भने । 

पौडेलले मुलुक जोखिमको स्तरमा आइपुगेको भन्दै सार्थक हस्तक्षेप गर्नुपर्ने अवस्था आएको बताए । ‘आर्थिक समस्या समाधानको सकारात्मक पहल गरेनौँ भने मन्त्री या प्रधानमन्त्रीले दाबी गरेर बिग्रँदो आर्थिक अवस्थाबाट बाहिर निकाल्न कठीन हुनेछ,’ पौडेलले भने ।