नेपाल राष्ट्र बैंकका गभर्नर महाप्रसाद अधिकारीलाई गरिएको कारबाही तत्काल फिर्ता लिन एमालेका तीन पूर्वअर्थमन्त्रीले माग गरेका छन् । 

नेकपा एमालेको केन्द्रीय प्रचार विभागले मुलुकको आर्थिक अवस्थाबारे गरेको पत्रकार सम्मेलनमा उनीहरूले गभर्नर अधिकारीमाथिको कारबाही अनुचित भएको बताएका हुन् । 

एमालेका तीन पूर्वअर्थमन्त्री विष्णुप्रसाद पौडेल, सुरेन्द्र पाण्डे र युवराज खतिवडाले सामूहिक विज्ञप्ति निकालेर अर्थतन्त्र संकटमा परेको र अहिलेको सरकार गम्भीर नभएको उल्लेख गरेका छन् । 

गभर्नर अधिकारीलाई हटाउने गरी भएको वर्तमान सरकारको काम गलत र घृणित भएको उनीहरूले आरोप लगाए । 

यो गलत अभ्यास भएकाले मुलुकको अर्थव्यवस्था झन् नकारात्मकतर्फ जाने भन्दै उनीहरूले गभर्नरमाथिको कारबाही सरकारले अविलम्ब फिर्ता लिनुपर्ने माग गरेका हुन् ।