नेकपा एमालेका उपमहासचिव विष्णु रिमालले चुनाव सार्ने उद्देश्यले सत्तारूढ गठबन्धनले आर्थिक संकटका लगाउने वातावरण बनाउन खोजेको टिप्पणी गरेका छन् । 

सोमवार फेसबुकमा स्टेटस लेख्दै रिमालले देशभर एमालेको जनलहर बढेको देखेर गठबन्धन हल्लिएको रिमालले बताए ।

नेत्रविक्रम चन्द विप्लव नेतृत्वको नेपाल कम्युनिष्ट पार्टीले चुनाव सार्न भनेको र पाँच दलीय गठबन्धन पनि त्यसैलाई उपयोग गर्ने ध्याउन्नमा लागेको रिमालको भनाइ छ । 

केही दिनअघि विप्लव नेतृत्वको नेकपाले सत्तारूढ राजनीतिक दलहरूका नेतालाई केही समय चुनाव सार्ने हो भने आफूहरू पनि चुनावी प्रतिस्पर्धामा सहभागी हुने बताएको सूचना सार्वजनिक भएको थियो । 

चुनाव प्रभावित गर्नका लागि कुनै उपाय नलागे गठबन्धनमा रहेका दलहरू देशका आर्थिक संकटकाल घोषणा गर्न पनि पछि नपर्ने अवस्था देखिएको रिमालले उल्लेख गरेका छन् । 

त्यसबाहेक भर्खर नियुक्त भएका कानून मन्त्री गोविन्द बन्दीलाई कानूनमा छिद्र खोजेर चुनाव प्रभावित पार्ने उपाय निकाल्न जिम्मेवारी दिएको समेत रिमालले चर्चा गरेका छन् । 

सत्ताको नेतृत्व गरिरहेका दलहरू हार्ने चुनाव कसले गर्छ भन्दै अर्थतन्त्र थप बिगारेर चुनाव नहुने वातावरण बनाउन राष्ट्र बैंकको गभर्नरमाथि धावा बोलिएको आरोपसमेत रिमालले लगाएका छन् ।

सरकारले गत शुक्रवार नेपाल राष्ट्र बैंकका गभर्नर महाप्रसाद अधिकारीलाई निलम्बन गर्ने निर्णय गरेको थियो ।