पूर्वराजा ज्ञानेन्द्र शाहले छिमेकी राष्ट्रहरूसँग अवलम्बन गर्नुपर्ने नीतिप्रति सधैँ चनाखो हुनुपर्ने बताएका छन् । 

बुधवार नयाँ वर्ष २०७९ को अवसरमा शुभकामना सन्देश जारी गर्दै उनले भनेका छन्, ‘छिमेकी मित्र राष्ट्रहरूप्रति हामीले अवलम्बन गर्ने नीति तथा व्यवहारले हाम्रो उन्नति प्रगतिलाई मात्र प्रभावित गर्दैन, मुलुकको स्थायित्व, शान्ति र राष्ट्रियता समेतमा कुनै न कुनै स्तरको प्रभाव पर्न जाने अवस्थालाई सम्झेर हामी सदैव चनाखो हुनुपर्छ ।’ 

यस्तै उनले नेपाल कोहीसँग कतै टाँसिएर कसैप्रति दूरभाव राख्ने मार्गतर्फ लाग्यो भन्ने धारणा उत्पन्न हुनु आफैंमा आत्महीनताको विषय बनेको बताएका छन् । 

‘वर्ष बदलिँदा हाम्रो हर्ष पनि बढ्नुपर्छ, भित्ताको पात्रो फेरिएपछि जनजीवनमा स्तरवृद्धि पनि हुनुपर्छ,’ उनले भनेका छन्, ‘तर चर्का नारा, गहकिला आशा, आश्वासन तथा अर्थहीन परिवर्तन वा रुपान्तरणको प्रक्रियाले नेपाली जनमानसलाई शान्त र सन्तुष्ट पार्न सकेको छैन । चिन्ताको विषय हाम्रो यो हो ।’

साथै उनले नेपालीको घरघरमा बढ्दो महँगी र थपिँदो आर्थिक बोझले जीवन गुजारा गर्न अन्त्य कठिन भएको दुखेसो भएको पनि लेखेका छन् । ‘नेपाली सबैको भलो होस्, सबै नेपालीको सपना साकार होस् र प्रत्येक प्रयास उपलब्धिमा परिणत होस्, यही हाम्रो अभिलाषा हो,’ उनले कामना गरेका छन् ।