नेपाली कांग्रेसले रूपन्देहीको सिद्धार्थनगर नगरपालिका मेयर पदमा नेता इस्तियाक अहमद खानलाई अगाडि सार्ने भएको छ ।

नगरमा आफ्नो पुरानो विरासत फर्काउने दाउका साथ कांग्रेसले समाजमा राम्रो छवि बनाएका नेता खानलाई चुनावी मैदानमा उतार्ने भएको नगर सभापति कोशिशबहादुर खड्काले जानकारी दिए । 

खान संविधानसभा सदस्य समेत हुन् । सिद्धार्थनगर नगरपालिका भैरहवाका नामले बढी परिचित छ । गत निर्वाचनमा भैरहवामा नेकपा एमालेबाट मेयरमा हरिप्रसाद अधिकारी र उपमेयरमा पनि एमालेकै उमा काफ्ले जितेका थिए ।

काफ्ले अहिले नेकपा एकीकृत समाजवादीमा लागेकी छन् । भैरहवामा राष्ट्रिय प्रजातन्त्र पार्टी (राप्रपा) को पनि राम्रो प्रभाव छ ।

भैरहवामा सत्तारुढ गठबन्धनले चुनावी तालमेल गरेर अगाडि बढ्ने सहमति गरिसकेको छ । त्यहाँ उपमेयर माओवादी केन्द्रलाई दिने तयारी छ । रूपन्देहीमा १६ स्थानीय तह छन् ।

गत निर्वाचनमा जिल्लामा कांग्रेसले २ वटा पालिकामा मात्र जीत निकालेको थियो ।