नेपाली कांग्रेसबाट बुटवल उपमहानगरपालिकाको मेयरका लागि खेलराज पाण्डेलाई एकलौटी रूपमा सिफारिस गरिएको भन्दै पार्टीभित्र विरोध भएको छ ।

नगर सभापति समेत रहेका पाण्डेको नाम सिफारिस भएपछि उनकै समूहका नेताहरूले विद्रोह गरेका छन् । 

कांग्रेस २ नम्बर क्षेत्रका क्षेत्रीय सभापति हरि लम्साल सहितको टीमले अन्य आकांक्षीसँग कुनै छलफल, समन्वय र परामर्श विना नगरले एकलौटी रूपमा प्रदेश समितिलाई पाण्डेको नाम पठाएको भन्दै विरोध गरेको हो । 

सभापति लम्साल महाधिवेशन प्रतिनिधि चुन्नप्रसाद पौडेल र चोपनारायण श्रेष्ठ सहितको टीमले कांग्रेस प्रदेश समितिका सभापति अम्मरसिंह पुनलाई विधान विपरीत गरिएको पाण्डेको सिफारिस मान्य नहुने भन्दै निवेदन बुझाएका छन् । 

लम्साल पनि मेयरका आंकाक्षी हुन् । ‘पाण्डेको सिफारिस मान्य हुँदैन, त्यो विधान विपरीत छ । नगरले कसैलाई पनि थाहा नै नदिएर सिफारिस गरेको छ,’ लम्सालले लोकान्तरसँग भने । 

पाण्डेविरुद्ध कांग्रेसका २ भन्दा बढी नेताहरूले प्रदेश समितिमा निवेदन बुझाएका छन् ।  

पाण्डे र लम्साल दुवै जना संस्थापन इतरका नेता हुन् । यता नेपाली कांग्रेस बुटवल नगर सचिव छाया पोखरेलले पार्टीको नगर समितिको पूर्ण बैठकबाट विधान अनुसार पाण्डेको नाम सिफारिस गरिएको बताए ।

‘सिंगल उम्मेदवार सिफारिस गर्ने भनेपछि खेलराज दाइको नाम सिफारिस भएको हो । निर्णय विधान विपरीत भएजस्तो मलाई लाग्दैन । मेयरका आकांक्षीहरूबीच छलफल त भयो होला, त्यो मलाई जानकारी भएन,’ पोखरेलले भने ।

पाण्डे अघिल्लो निर्वाचनमा पनि उम्मेदवार थिए । उनी एमालेका शिवराज सुवेदीसँग पराजित भएका थिए । बुटवलमा गठबन्धनले मेयर कांग्रेस र उपमेयर नेकपा एकीकृत समाजवादीलाई दिने चर्चा छ ।