सत्तारुढ गठबन्धनले महानगरपालिका र उपमहानगरको भागबण्डा टुंगो लगाएको छ । 

प्रधानमन्त्रीनिवास वालुवाटारमा बसेको ५ दलीय गठबन्धनको बैठकले लामो रस्साकस्सीपछि उपमहानगरपालिकामा तालमेलको सहमति गरेको हो ।

नेपालगञ्ज उपमहानगरपालिकाको मेयरको उम्मेदवारलाई लिएर गठबन्धनमा विवाद चुलिएको  थियो । नेपालगञ्जको मेयर नेपाली कांग्रेसले पाउने गरी गठबन्धनमा सहमति भएको छ ।

वैशाख ३० गते हुने स्थानीय तह चुनावका लागि ६ वटा महानगरपालिका र ११ वटा उपमहानगरपालिकामा सत्तारुढ गठबन्धनले भागबण्डा टुंग्याएको छ । 

सबै महानगरपलिका र उपमहानगरपालिकामा तालमेलको लागि सिट बाँडफाँट टुंगो लागेको माओवादी केन्द्रका नेताहरूले बताएका छन् । 

स्थानीय तह निर्वाचनमा देशभरका ११ उपमहानगरपालिकामध्ये ७ वटा उपमहानगरपालिकाको नेतृत्व कांग्रेसले पाउनेछ । 

नेकपा माओवादी केन्द्रले जीतपुरसिमरा र घोराही गरी २ उपमहानगरपालिकाको नेतृत्व पाउनेछ । यी २ उपमहानगरमा कांग्रेसले उपमेयर पाउने भएको छ । 

एकीकृत समाजवादीले हेटौंडा र जनता समाजवादी पार्टीले जनकपुर उपमहानगरपालिकाको नेतृत्व पाउने भएको छ । यी उपमहानगरपालिकामा कांग्रेसले उपमेयरको उम्मेदवार उठाउने भएको छ ।

यीबाहेक धरान, इटहरी, कलैया, बुटवल, तुलसीपुर, नेपालगञ्ज र धनगढीको नेतृत्व कांग्रेसले पाउनेछ ।

धरान, धनगढी र नेपालगन्जको उपेयर माओवादी केन्द्रले पाउने भएको छ । इटहरी, बुटवल र तुलसीपुरमा एकीकृत समाजवादीले उपमेयर पाउने भएको छ । 

सत्तारुढ गठबन्धनले महानगरपालिकाको भागवण्डा मंगलबार नै टुंग्याएका थिए । महानगर र उपमहानगरपालिकाको नेतृत्व भागबण्डाको सहमति पत्रमा हस्ताक्षर भएको छ ।

दलहरूबीच भएको छलफल अनुसार, काठमाडौं, ललितपुर र विराटनगर महानगरपालिका कांग्रेस पाउने भएको छ । 

भरतपुर माओवादी केन्द्रले, पोखरा एकीकृत समाजवादीले र वीरगञ्ज जनता समाजवादी पार्टीले पाउने भएको छ । यी ३ वटै महानगरमा कांग्रेसले उपमेयर पाउने भएको छ ।
 
काठमाडौंमा एकीकृत समाजवादीले उपमेयर पाउने भएको छ भने ललितपुरमा माओवादीले र विराटनगरमा जसपाले उपमेयर पाउने भएको छ ।

पढ्नुहोस् सहमतिपत्र –