नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी फुटको संघारमा पुगेको छ । बुधवार सचिवालय सदस्य हेमन्तप्रकाश ओली ‘सुदर्शन’ र धर्मेन्द्र वास्तोला ‘कञ्चन’ लाई पदमुक्त गरेसँगै पार्टीमा संकट उत्पन्न भएको हो । 

आफूहरूलाई कारबाही गरेपछि सुर्दशन र कञ्चन पक्षले नयाँ पार्टी गठन गर्ने वा महासचिव विप्लव र प्रवक्ता प्रकाण्डलाई कारबाही गर्नेबारे छलफल गरिरहेको छ । 

‘हामी त्यो विषयमा छलफल गरिरहेका छौं, त्यसपछि जानकारी दिनेछौँ,’ कञ्चनले लोकान्तरसँग भने । 

स्थानीय निर्वाचनमा भाग लिने विषयमा विप्लवले गरेको प्रस्ताव अल्पमतमा परेको थियो । चुनाव वहिष्कारको पक्षमा बहुमत भएपछि त्यो प्रस्ताव पारित हुन सकेन । 

‘त्यही विषयलाई लिएर महासचिवलाई हिमुलियसन (अपमानित महसुस) भइरहेको थियो,’ कारबाहीको वक्तव्य पढेको भन्दै कञ्चनले भने, ‘पार्टीको नीतिबाहिर गएर चुनावमा केही नेताले उम्मेदवारी दिएपछि करेक्सन गर्नुहोला, पार्टी बेखबर छैन भनेर विज्ञप्ति निकालेको थिएँ । महासचिवसँग कुरा हुँदा छलफल गरेर निष्कर्ष निकालौँ भनेको थिएँ ।’

सो पक्ष अहिले छलफलमा जुटेको छ ।