विराटनगर-१८, इस्लामपुरस्थित नेपाल–भारतको सीमाक्षेत्र (दशगजा)मा भारतीय सुरक्षाकर्मी एसएसबीले हवाई फायर गरेको छ । 

स्थानीयवासीले दिएको जानकारीअनुसार सीमा सुरक्षामा खटिएका एसएसबीले तीन राउण्ड हवाई फायर गरेका हुन् । 

सोमवार दिउँसो २ बजे ड्युटीमा खटिएका एक एसएसबीले दुई राउण्ड जमिन र एक राउन्ड आकाशतिर फायर गरेको विराटनगर–१८ इस्लामपुरका स्थानीय सुरज मण्डलले जानकारी दिए । 

उनका अनुसार ती एसएसबीले मदिरा सेवन गरेका थिए । ‘होहल्ला गरेपछि स्थानीयवासीले उनलाई घेरा हालेका थिए, भीड बढेपछि सुरक्षाका लागि भन्दै हवाई फायर गरेको हुन सक्छ,’ सीमा क्षेत्रमा खटिएका एक सुरक्षाकर्मीले भने । हवाई फायरबाट कुनै मानवीय क्षति भने भएको छैन ।

मोरङका प्रहरी प्रमुख एसपी शान्तिराज कोइरालाले दशगजा क्षेत्रमा गोली चलेको पुष्टि गरेका छन् । 

प्रमुख जिल्ला अधिकारी काशीराज दाहालका अनुसार गोली नेपालतिर नभई भारततिर चलेको बताए । 

‘गोली चलेको हो,’ उनले भने, ‘उनीहरूबीचमै समस्या भएर गोली चलेको हुन सक्छ ।’ 

गोली चलेको ठाउँमा स्थानीयवासीको भीड लागेको छ ।